തൃശൂർ: അതിരൂപതയിലെ മുതിർന്ന വൈദികൻ ചാക്കോ പാറയിൽ (84) നിര്യാതനായി. തൃശൂർ മൈനർ സെമിനാരി, ആലുവ സെന്റ് ജോസഫ് പൊന്തിഫിക്കൽ സെമിനാരി എന്നിവിടങ്ങളിൽ വൈദിക പരിശീലനം പൂർത്തിയാക്കി 1964 ഡിസംബർ ഒന്നിന് പോൾ ആറാമൻ മാർപാപ്പയിൽനിന്ന് തിരുപ്പട്ടം സ്വീകരിച്ചു. കോട്ടപ്പടി, പരിയാരം ഇടവകകളിൽ സഹവികാരിയായും അരിമ്പൂർ ഇടവകയിൽ നടത്തു വികാരിയായും വെള്ളാറ്റഞ്ഞൂർ, മുള്ളൂർക്കര, മച്ചാട്, ഏനാമ്മാവ്, മുണ്ടൂർ, പരക്കാട്, ചൂണ്ടൽ, എടക്കളത്തൂർ, അന്തിക്കാട് എന്നിവിടങ്ങളിൽ വികാരിയായും ചേലക്കരയിൽ ഫൊറോന വികാരിയായും സേവനം ചെയ്തിട്ടുണ്ട്. മനക്കൊടി സാവിയോ ഹോമിൽ അസി. ഡയറക്ടറായും ഡയറക്ടറായും ദീർഘകാലം സേവനമനുഷ്ഠിച്ച അദ്ദേഹം ചേലക്കര ബാലഭവൻ ഡയറക്ടർ, ഫാ. ആന്റണി തച്ചുപറമ്പിൽ ട്രസ്റ്റ് ഡയറക്ടർ, സെന്റ് ആൻസ് ഇൻസ്റ്റിറ്റ്യൂട്ട്, സി.ആർ.എസ് എന്നിവിടങ്ങളിൽ അസി. ഡയറക്ടറായും പ്രവർത്തിച്ചു. ഏനാമ്മാവ്, ചേലക്കര സ്കൂളുകളിലെ മാനേജറായും വിവിധ സന്യാസിനിസമൂഹങ്ങളുടെ കപ്ലോനായും ശുശ്രൂഷ ചെയ്തിട്ടുണ്ട്. വെളയനാട് പരേതരായ കുഞ്ഞുവറീത്-റോസ ദമ്പതികളുടെ മകനാണ്. സഹോദരങ്ങൾ: അന്നക്കുട്ടി, പരേതരായ ലോനപ്പൻ, ഇട്ട്യേര, മേരി, അന്തോണി. സംസ്കാര ശുശ്രൂഷ വ്യാഴാഴ്ച രാവിലെ 6.30ന് തൃശൂർ സെന്റ് ജോസഫ് വൈദിക മന്ദിരത്തിൽ നടക്കും. അവിടെ എട്ട് വരെ പൊതുദർശനത്തിന് ശേഷം മനക്കൊടി സാവിയോ ഹോമിലേക്ക് കൊണ്ടുപോകും. വെളയാനാടുള്ള സഹോദരന്റെ മകൻ പാറയിൽ ഇട്ട്യേര ജോർജിന്റെ വസതിയിൽ 10 മുതൽ ഉച്ചക്ക് രണ്ട് വരെ പൊതുദർശനത്തിന് വെക്കും. വീട്ടിലെ സംസ്കാര ശുശ്രൂഷകൾക്ക് അതിരൂപത സഹായമെത്രാൻ മാർ ടോണി നീലങ്കാവിലും 2.30ന് ആരംഭിക്കുന്ന ദൈവാലയ സംസ്കാര ശുശ്രൂഷകൾക്ക് മാർ ജേക്കബ് തൂങ്കുഴി, ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ, മാർ ടോണി നീലങ്കാവിൽ എന്നിവതും കാർമികത്വം വഹിക്കും.