ചാവക്കാട്: പത്മശ്രീ ജേതാവും ചാവക്കാട് വല്ലഭട്ട കളരി സംഘത്തിന്റെ കളരിയാശാനുമായ ഉണ്ണി ഗുരുക്കൾ (ശങ്കരനാരായണ മേനോൻ -94) നിര്യാതനായി. വാർധക്യ സഹജമായ അസുഖത്താൽ രണ്ടു മാസത്തോളമായി കിടപ്പിലായിരുന്നു. കഴിഞ്ഞ വർഷമാണ് രാജ്യം പത്മശ്രീ പുരസ്കാരം നൽകി ഉണ്ണി ഗുരുക്കളെ ആദരിച്ചത്. 2019ലെ കേരള ഫോക്ലോർ അക്കാദമി ഗുരുപൂജ അവാർഡ്, കലാമണ്ഡലം സിൽവർ ജൂബിലി അവാർഡ് തുടങ്ങിയ പുരസ്കാരങ്ങളും നേടിയിട്ടുണ്ട്. മലപ്പുറം തിരൂർ നിറമരുതൂരിൽ കളരിപ്പയറ്റ് വിദഗ്ധരുടെ കുടുംബമായ മുടവങ്ങാട്ട് തറവാട്ടിലെ ശങ്കുണ്ണി പണിക്കരുടെയും ചുണ്ടയിൽ കല്യാണിക്കുട്ടിയമ്മയുടെയും മൂന്നാമത്തെ മകനായി 1929ലാണ് ജനനം. ഏഴാം വയസ്സ് മുതൽ കളരിപ്പയറ്റ് പരിശീലനം തുടങ്ങി. മുടവങ്ങാട്ട് ഗൃഹത്തിലെ വല്ലഭട്ട കളരിയിലും സ്വഗൃഹത്തിലെ കളരിയിലുമായിരുന്നു പരിശീലനം. 14ാം വയസ്സിൽ മുടവങ്ങാട്ട് കളരിയിൽ അരങ്ങേറ്റം കുറിച്ചു. മലപ്പുറം ഒഴൂർ കോഴിശ്ശേരി പുന്നക്കൽ തറവാട്ടിലെ സൗദാമിനിയമ്മയാണ് ഭാര്യ. മക്കൾ: കൃഷ്ണദാസ് (കേരള കളരിപ്പയറ്റ് അസോസിയേഷൻ സംസ്ഥാന പ്രസിഡന്റ്), രാജീവ്, ദിനേശൻ (കളരിപ്പയറ്റ് അസോസിയേഷൻ തൃശൂർ ജില്ല സെക്രട്ടറി), നിർമല. സംസ്കാരം ബുധനാഴ്ച വൈകീട്ട് വീട്ടുവളപ്പിൽ.
