പാലക്കാട്: ജില്ല കോണ്‍ഗ്രസ് ജനറല്‍ സെക്രട്ടറി കടയങ്കാട് വീട്ടില്‍ എ. രാമദാസ് (62) നിര്യാതനായി. അര്‍ബുദ രോഗബാധയെ തുടര്‍ന്ന് എറണാകുളം അമൃത ആശുപത്രിയില്‍ ചികിത്സയിലായിരുന്നു. ചൊവ്വാഴ്ച വൈകീട്ട് ഏഴോടെയായിരുന്നു അന്ത്യം. വിദ്യാർഥി രാഷ്ട്രീയത്തിലൂടെയാണ് പൊതുപ്രവര്‍ത്തന രംഗത്തേക്ക് കടന്നുവന്നത്. 1985- 1986ല്‍ ആലത്തൂര്‍ എസ്.എന്‍ കോളജ് ചെയര്‍മാനായിരുന്നു. കെ.എസ്.യു ജില്ല സെക്രട്ടറി, യൂത്ത് കോണ്‍ഗ്രസ് ജില്ല ട്രഷറര്‍, കണ്ണാടി പഞ്ചായത്ത് അംഗം എന്നീ സ്ഥാനങ്ങള്‍ വഹിച്ചിട്ടുണ്ട്. നിലവില്‍ ജില്ല ആശുപത്രി മാനേജിങ് കമ്മിറ്റി അംഗവും ഓള്‍ കേരള ലോട്ടറി ഏജന്റ്‌സ് ആന്‍ഡ് സെല്ലേഴ്സ് കോണ്‍ഗ്രസ് (ഐ.എന്‍.ടി.യു.സി) പാലക്കാട് ജില്ല പ്രസിഡന്റും കണ്ണാടി സഹകരണ അര്‍ബന്‍ ക്രഡിറ്റ് സൊസെറ്റി പ്രസിഡന്റുമാണ്. പരേതനായ ആറുകുട്ടിയുടെയും ജാനുവിന്റെയും മകനാണ്. ഭാര്യ: കനകലത. സഹോദരങ്ങള്‍: സുരേഷ്, സുനില്‍, കല്യാണി, വസന്ത, സുന്ദരി, സുഭദ്ര, വിജയകുമാരി. സംസ്കാരം പിന്നീട്.
