ഗുരുവായൂർ: ഭർത്താവിനൊപ്പം ഗുരുവായൂരിൽ ദർശനത്തിനെത്തിയ സ്ത്രീ പൊതു ശുചിമുറിയിൽ ആത്മഹത്യ ചെയ്ത നിലയിൽ. പാലക്കാട് തോടുകാട് പലമ്പുള്ളി വീട്ടിൽ വിജയകുമാരിയാണ് (56) മരിച്ചത്. ഭർത്താവ് ചിതലിപ്പാലം സ്വദേശി മഠത്തിൽ പൂപ്പുള്ളി സുദേവനൊപ്പമാണ് ശനിയാഴ്ച രാവിലെ ദർശനത്തിനെത്തിയത്. മമ്മിയൂർ ക്ഷേത്രത്തിൽ ദർശനത്തിന് ശേഷമാണ് ഗുരുവായൂരിലെത്തിയത്. ഇരുവരും കദളിപ്പഴംകൊണ്ട് തുലാഭാരം നടത്തിയിരുന്നു. ഇതിനുശേഷമാണ് 10.30ഓടെ പാഞ്ചജന്യം ഗെസ്റ്റ് ഹൗസിനു സമീപമുള്ള പൊതുശൗചാലയത്തിലേക്ക് പോയത്. ഏറെ സമയം കഴിഞ്ഞിട്ടും ഭാര്യയെ കാണാതിരുന്നതിനാൽ സുദേവൻ ശൗചാലയ നടത്തിപ്പുകാരോട് വിവരം പറഞ്ഞു. ഇവർ ശുചിമുറി തുറന്ന് പരിശോധിച്ചപ്പോഴാണ് ധരിച്ചിരുന്ന കസവ് സാരി കീറിയെടുത്ത ഭാഗംകൊണ്ട് തൂങ്ങിയനിലയിൽ കണ്ടത്. ടെമ്പ്ൾ പൊലീസ് മേൽനടപടികൾ സ്വീകരിച്ചു. മക്കൾ: സിൻജു, ശ്രീജിത്ത്. മരുമകൻ: അജയ്കുമാർ.