ചാവക്കാട്: എടക്കഴിയൂരിൽ വീട്ടമ്മ വെള്ളക്കെട്ടിൽ വീണ് മരിച്ച നിലയിൽ. എടക്കഴിയൂർ സിങ്കപൂർ പാലസിനുപടിഞ്ഞാറ് പുളിക്കൽ ഷംസുദ്ദീന്റെ ഭാര്യ റഹ്മത്താണ് (50) മരിച്ചത്. ചൊവ്വാഴ്ച വൈകീട്ട് ഇവരുടെ വീടിന് 100 മീറ്റർ അകലെ പാലക്കൽ ഹസൈനാരുടെ വീടിനോട് ചേർന്ന വെള്ളക്കെട്ടിലാണ് മൃതദേഹം കണ്ടെത്തിയത്. സുഖമില്ലാതെ കഴിയുന്ന ഹസൈനാരുടെ ഭാര്യയെ സന്ദർശിക്കാൻ പോയതായിരുന്നു റഹ്മത്ത്. ഇവരെ കണ്ട് വീട്ടിലേക്ക് മടങ്ങിയശേഷമാണ് മരണം. ഹസൈനാരുടെ മകളാണ് മൃതദേഹം ആദ്യം കണ്ടത്. ഇവരുടെ കരച്ചിൽകേട്ട് പരിസരവാസികൾ ഓടിയെത്തി കരക്കെത്തിച്ചപ്പോഴേക്കും മരിച്ചിരുന്നു. ചാവക്കാട് സ്വകാര്യ ആശുപത്രിയിൽ എത്തിച്ച മൃതദേഹം പൊലീസ് നടപടികൾക്കുശേഷം താലൂക്ക് ആശുപത്രി മോർച്ചറിയിലേക്ക് മാറ്റി. മക്കൾ: വാഹിദ്, ബാസിത്ത്, ബാസിൽ. ഖബറടക്കം ബുധനാഴ്ച പോസ്റ്റ്മോർട്ടത്തിനുശേഷം എടക്കഴിയൂർ ജുമാഅത്ത് പള്ളി ഖബർസ്ഥാനിൽ.
