ഇരിങ്ങാലക്കുട: പടിയൂർ ഗ്രാമപഞ്ചായത്തിലെ കെട്ടുച്ചിറയിൽ ബന്ധുവിന്റെ സുഹൃത്തിനൊപ്പം വഞ്ചിയിൽ മീൻ പിടിക്കാൻ പോയ വിദ്യാർഥി വഞ്ചി മറിഞ്ഞ് മരിച്ചു. കല്ലേറ്റുങ്കര പഞ്ഞപ്പിള്ളി തോപ്പിൽ വീട്ടിൽ പ്രദീപിന്റെ മകൻ പ്രണവാണ് (18) മരിച്ചത്. വ്യാഴാഴ്ച പുലർച്ച മൂന്നരയോടെയാണ് അപകടം. ഒഴുക്കിൽപെട്ട മീൻവല ശരിയാക്കാനുള്ള ശ്രമത്തിനിടെ വഞ്ചി മറിയുകയായിരുന്നു. കൂടെ ഉണ്ടായിരുന്നയാൾ നീന്തി രക്ഷപ്പെട്ടു. പ്രണവ് ശക്തമായ ഒഴുക്കിൽപെട്ടു. രാവിലെ ഒമ്പതോടെ കാട്ടൂർ പൊലീസും ഇരിങ്ങാലക്കുടയിൽനിന്നുള്ള അഗ്നിരക്ഷ സേനയിലെ മുങ്ങൽ വിദഗ്ധരും നാട്ടുകാരും ചേർന്നാണ് മൃതദേഹം കണ്ടെടുത്തത്. ആളൂർ ആർ.എം.എച്ച്.എസിൽ പ്ലസ് ടു പഠനം പൂർത്തിയാക്കിയ പ്രണവ് സേലത്ത് റേഡിയോളജി പഠനത്തിന് പോകാൻ തയാറെടുക്കുമ്പോഴാണ് ദുരന്തം. മാതാവ്: സൗമ്യ. സഹോദരി: മീനാക്ഷി.