ആമ്പല്ലൂർ: രണ്ടുദിവസം മുമ്പ് കാണാതായ സി.ഐ.ടി.യു നേതാവിനെ ആലുവ കരുമാലൂര് മാമ്പ്ര പുഴയില് മുങ്ങി മരിച്ചനിലയില് കണ്ടെത്തി. ആമ്പല്ലൂർ എരിപ്പോട് കാഞ്ഞിരത്തിങ്കല് പോളാണ് (72) മരിച്ചത്. ശനിയാഴ്ച രാവിലെ വീട്ടിൽനിന്ന് ഇറങ്ങിയതാണ്. വൈകീട്ട് കാണാതായതോടെ ബന്ധുക്കൾ പൊലീസിൽ അറിയിച്ചു. തിങ്കളാഴ്ച രാവിലെയാണ് മൃതദേഹം കണ്ടെത്തിയത്. ആലുവ വെസ്റ്റ് പൊലീസ് മേല്നടപടി സ്വീകരിച്ചു. മക്കൾ വിദേശത്തായതിനാൽ പോൾ തനിച്ചാണ് താമസിച്ചിരുന്നത്. മൂന്ന് മാസം മുമ്പ് ഭാര്യ മരിച്ചിരുന്നു.
സി.പി.എം അളഗപ്പ നഗർ ബ്രാഞ്ച് കമ്മിറ്റി അംഗമായ പോൾ, മുൻ ലോക്കൽ കമ്മിറ്റി അംഗവും ആമ്പല്ലൂർ സർവിസ് സഹകരണ ബാങ്ക് പ്രസിഡന്റായും പ്രവർത്തിച്ചിട്ടുണ്ട്. നിലവിൽ സി.ഐ.ടി.യു അളഗപ്പ ടെക്സ്റ്റൈൽസ് യൂനിയൻ പ്രസിഡന്റാണ്. ഭാര്യ: പരേതയായ ബേബി. മക്കൾ: ബെഞ്ചമിൻ, ഷാർലറ്റ്. മരുമക്കൾ: സിജോ, സാം. സംസ്കാരം ബുധനാഴ്ച വൈകീട്ട് മൂന്നിന് വെണ്ടോർ സെന്റ് മേരീസ് പള്ളി സെമിത്തേരിയിൽ.