തിരൂർ: അമിതവേഗതയിലെത്തിയ കാർ സ്കൂട്ടർ ഇടിച്ച് തെറിപ്പിച്ചതിനെത്തുടർന്ന് യുവാവിന് ദാരുണാന്ത്യം. സ്കൂട്ടർ യാത്രക്കാരനായ കൈമലശ്ശേരി സ്വദേശിയും തൃപ്രങ്ങോട് പഞ്ചായത്ത് മുൻ കൗൺസിലറുമായ കടമ്പിൽ പൂഴിത്തറമ്മൽ ബാവയുടെ മകൻ തസ്‌ലിമാണ് (40) മരിച്ചത്. ചമ്രവട്ടം പാതയിൽ ആലിങ്ങലിൽ തിങ്കളാഴ്ച രാവിലെ എട്ടിനാണ് അപകടം. തിരുവനന്തപുരം കോവളം സ്വദേശികളായ കുടുംബം സഞ്ചരിച്ച കാറാണ് അപകടം വരുത്തിയത്. സ്കൂട്ടറിൽ ഇടിച്ചതോടെ നിയന്ത്രണംവിട്ട കാർ വീണ്ടും അതിവേഗതയിൽ 200 മീറ്ററോളം യുവാവിനെ വലിച്ചിഴച്ചു കൊണ്ടുപോയി തൊട്ടടുത്ത ഹോട്ടലിലെ മതിലിൽ ഇടിച്ചാണ് നിന്നത്. ഹോട്ടൽ ഭാഗികമായി തകർന്നു. നാട്ടുകാർ ഉടനെ തസ്‌ലിമിനെ കോട്ടക്കലിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. തിരൂർ എം.ഇ.ടി സെൻട്രൽ സ്കൂളിലെ അധ്യാപികയായ എൻ. നിഷിദയാണ് ഭാര്യ. മക്കൾ: നിദ, നിഹ (ഇരുവരും വിദ്യാർഥികൾ). മാതാവ്: സുബൈദ. സഹോദരങ്ങൾ: അബ്ദുസ്സമദ്, തഫ്സീന.
