ചെറുതുരുത്തി: മഴയിൽ നിയന്ത്രണംതെറ്റിയ ഗുഡ്സ് ലോറിയിടിച്ച് കാൽനടയാത്രക്കാരൻ മരിച്ചു. ദേശമംഗലം തലശ്ശേരി സെന്ററിൽ തട്ടുകട നടത്തുന്ന നെല്ലിക്കൽ വീട്ടിൽ പരേതനായ കുഞ്ഞുണ്ണിയുടെ മകൻ കിട്ടുണ്ണി (65) എന്ന പപ്പനാണ് മരിച്ചത്. കല്യാണ മണ്ഡപത്തിലേക്ക് നടന്ന് പോകുമ്പോൾ തലശ്ശേരി കള്ളുഷാപ്പ് പരിസരത്ത് വെച്ച് ഗുഡ്സ് ലോറി ഇടിക്കുകയായിരുന്നു. ഞായറാഴ്ച ഉച്ചക്ക് രണ്ടോടെ ആറങ്ങോട്ടുകര ഭാഗത്ത് നിന്നും തലശ്ശേരി ഭാഗത്തേക്ക് വരികയായിരുന്ന ഗുഡ്സ് ലോറി മഴയെ തുടർന്ന് നിയന്ത്രണം തെറ്റി കിട്ടുണ്ണിയെ ഇടിച്ച് മതിലിൽ ചെന്നിടിച്ചുനിൽക്കുകയായിരുന്നു. മതിലിന്റെയും ഗുഡ്സ് ലോറിയുടെയും ഇടയിൽ പെട്ടാണ് മരണം. നാട്ടുകാർ മുളങ്കുന്നത്തുകാവ് മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: സുലോചന. മക്കൾ: പ്രതാപൻ, പ്രഭ. മരുമക്കൾ: സനിത, ശരവണൻ.