കുന്നംകുളം: ചൂണ്ടല് പുതുശേരിയില് യുവാവിനെ ദുരൂഹ സാഹചര്യത്തില് ഷോക്കേറ്റ് മരിച്ചനിലയിൽ കണ്ടെത്തി. ഒരുമനയൂര് മുത്തമ്മാവ് പുതിയ വീട്ടിൽ ഇബ്രാഹീമിന്റെ മകൻ ശരീഫാണ് (38) മരിച്ചത്. കെ.എസ്.ഇ.ബി 110 കെ.വി ടവറിന് സമീപത്തെ സ്വകാര്യവ്യക്തിയുടെ കെട്ടിടത്തോട് ചേർന്നാണ് മൃതദേഹം കണ്ടെത്തിയത്. ശനിയാഴ്ച രാവിലെ എട്ടരയോടെ കെട്ടിടത്തിലെ ഐസ്ക്രീം കട തുറക്കാനെത്തിയ ജീവനക്കാരിയാണ് യുവാവിനെ മരിച്ചനിലയില് കണ്ടത്. തുടര്ന്ന് ഇവര് നാട്ടുകാരെ വിവരമറിയിക്കുകയായിരുന്നു. കുന്നംകുളം പൊലീസ് സ്റ്റേഷന് ഹൗസ് ഓഫിസര് യു.കെ. ഷാജഹാന്റെ നേതൃത്വത്തിൽ പൊലീസ് സംഘം നടത്തിയ പരിശോധനയില് ഒരു കൈയില് കട്ടിങ് പ്ലയറും മറ്റേ കൈയില് ഫ്യൂസ് കെട്ടുന്ന ഇലക്ട്രിക് കമ്പിയും കണ്ടെത്തി. കെട്ടിടത്തിന്റെ മീറ്ററിലേക്കുള്ള എർത്ത് കമ്പിയിൽനിന്ന് ഷോക്കേറ്റതാകുമെന്ന് കരുതുന്നു. കെ.എസ്.ഇ.ബി കൂനംമൂച്ചി സെക്ഷന് അസി. എൻജിനീയറുടെ നേതൃത്വത്തില് ഉദ്യോഗസ്ഥരും സ്ഥലത്തെത്തി പരിശോധന നടത്തി. ഇലക്ട്രീഷ്യനും ലൈറ്റ് ആന്ഡ് സൗണ്ട് സ്ഥാപനം നടത്തുന്നയാളുമായ ശരീഫ് കുറിക്കമ്പനിയുടെ കലക്ഷന് ഏജന്റുമായിരുന്നു. ഇയാള് എന്തിനാണ് ഇവിടേക്ക് വന്നതെന്ന് വ്യക്തമല്ല. രാവിലെ ഏഴരയോടെയാണ് വീട്ടിൽ നിന്നിറങ്ങിയതെന്ന് ബന്ധുക്കൾ പറഞ്ഞു. അസ്വാഭാവിക മരണത്തിന് പൊലീസ് കേസെടുത്തു. ഭാര്യ: ഐഷക്കുട്ടി. മക്കൾ: ഹിബ, ഹിഷാം, ഹാഷിം.