എറിയാട്: ഇരുനില വീടിന്റെ ടെറസിൽനിന്ന് വീണ് പരിക്കേറ്റ ഒമ്പതാം ക്ലാസ് വിദ്യാർഥി മരിച്ചു. എറിയാട് ഐ.എച്ച്.ആർ.ഡി കോളജിന് സമീപം ചീരേപറമ്പിൽ പ്രതാപൻ -ബിന്ദു ദമ്പതികളുടെ ഏക മകൻ അഭിനവ് (14) ആണ് മരിച്ചത്. കെ.വി.എച്ച്.എസ് സ്കൂൾ ഗ്രൗണ്ടിന് സമീപം നിർമാണത്തിലുള്ള പിതൃ സഹോദരിയുടെ വീടിനുമുകളിൽനിന്ന് കാൽ വഴുതി വീഴുകയായിരുന്നു. ശനിയാഴ്ച വൈകീട്ടാണ് സംഭവം. സാരമായി പരിക്കേറ്റ അഭിനവിനെ എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ഞായറാഴ്ച പുലർച്ച മരിച്ചു. എറിയാട് കെ.വി.എച്ച്.എസ്.എസ് ഒമ്പതാം ക്ലാസ് വിദ്യാർഥിയാണ്. നടപടികൾ പൂർത്തിയാക്കി സ്കൂളിൽ പൊതുദർശനത്തിന് ശേഷം മൃതദേഹം വൈകീട്ട് വീട്ടുവളപ്പിൽ സംസ്കരിച്ചു.