ചങ്ങരംകുളം/ പട്ടിക്കാട്: നിയന്ത്രണംവിട്ട ബൈക്ക് മറിഞ്ഞുണ്ടായ അപകടത്തിൽ ചികിത്സയിലിരുന്ന വിദ്യാർഥിനി മരിച്ചു. ചങ്ങരംകുളം പള്ളിക്കര സ്വദേശി ഓലയംപറമ്പിൽ ജോഷിയുടെ മകൾ അനഘയാണ് (20) മരിച്ചത്. അപകടത്തിൽ പരിക്കേറ്റ ചേലക്കടവ് സ്വദേശി പൂവക്കാട്ട് വീട്ടിൽ അക്ഷയ് (20) ചികിത്സയിലാണ്. മണ്ണുത്തി വടക്കഞ്ചേരി ദേശീയപാതയിൽ ചെമ്പൂത്രയിൽ വ്യാഴാഴ്ച ഉച്ചയോടെയാണ് അപകടമുണ്ടായത്. ഗുരുതര പരിക്കേറ്റ രണ്ടുപേരെയും നാട്ടുകാർ തൃശൂരിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും അനഘ വെള്ളിയാഴ്ച വൈകീട്ട് ആറോടെ മരിച്ചു. മൃതദേഹം ശനിയാഴ്ച പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ട് കൊടുക്കും. തൃശൂരിൽ നഴ്സിങ് വിദ്യാർഥിയായിരുന്നു അനഘ.
