എരുമപ്പെട്ടി: തൊഴിൽ നിഷേധിച്ചതിനെതിരെ തയ്യൂരിലെ ഐ.ജി എസ്റ്റേറ്റിന് മുന്നിൽ നടന്ന 70 ദിവസം നീണ്ട സമരം നയിച്ച തയ്യൂർ കോൽത്താഴത്തു വീട്ടിൽ കാർത്യായനി (84) നിര്യാതയായി. 1972ൽ റിട്ട. ഐ.ജി എൻ.ആർ. ശ്രീനിവാസയ്യരുടെ ഉടമസ്ഥതയിലുള്ള എസ്റ്റേറ്റിലായിരുന്നു സമരം. സി.പി.എം നേതൃത്വത്തിൽ കോൽതാഴത്ത് കാർത്യായനിയെ കൂടാതെ കോൽതാഴത്ത് വീട്ടിൽ സരോജിനി, പുലിയംകുന്നത്ത് വീട്ടിൽ ലക്ഷ്മി എന്നിവരായിരുന്നു സമരം നടത്തിയത്. സമരത്തിനിടെ മൂന്ന് വനിതകളെയും മുപ്പതോളം തവണ പൊലീസ് അറസ്റ്റ് ചെയ്തു. പുറമേനിന്നുള്ള തൊഴിലാളികളെ എസ്റ്റേറ്റിലേക്കെടുത്തപ്പോൾ സമരം കൂടുതൽ ശക്തിപ്പെടുത്തിയെങ്കിലും സമരക്കാരെയും സഹായികളെയും ലാത്തിച്ചാർജിലൂടെ അടിച്ചമർത്തുകയായിരുന്നു. സമര പരാജയത്തിനു ശേഷം കാർത്യായനി എരുമപ്പെട്ടിയിലെ ഖാദി നൂൽനൂൽപ് -നെയ്ത്ത് കേന്ദ്രത്തിൽ ജോലി ചെയ്തു. അവിവാഹിതയാണ്. സഹോദരങ്ങൾ: പരേതനായ അപ്പു, രാഘവൻ.