തളിക്കുളം: ചെമ്മാപ്പിള്ളി തൂക്കുപാലത്തിന് സമീപം വഞ്ചിയിൽനിന്ന് കനോലി പുഴയിൽ വീണ് കാണാതായ യുവാവിന്റെ മൃതദേഹം കരക്കടിഞ്ഞു. നാട്ടിക ചെമ്മാപ്പിള്ളി കോളനിയിലെ കടവത്ത് വീട്ടിൽ കൃഷ്ണദാസിന്റെ മകൻ കൃതീഷിന്റെ (32) മൃതദേഹമാണ് വെള്ളിയാഴ്ച രാവിലെ 6.30ഓടെ തൂക്കുപാലത്തിന് കിഴക്ക് ഭാഗത്തുനിന്ന് കണ്ടെത്തിയത്. വ്യാഴാഴ്ച വൈകീട്ട് നാലോടെ നാട്ടിക ചെമ്മാപ്പിള്ളി കടവിൽനിന്ന് സുഹൃത്തിനോടൊപ്പം വഞ്ചിയിൽ യാത്ര ചെയ്യുന്നതിനിടെ കൃതീഷ് പുഴയിൽ വീഴുകയായിരുന്നു. സുഹൃത്ത് നാട്ടിക സ്വദേശി വെള്ളാഞ്ചേരി വീട്ടിൽ നിഖിൽ (32) രക്ഷിക്കാനായി വെള്ളത്തിലേക്ക് ചാടിയെങ്കിലും വഞ്ചിയിൽ തട്ടി പരിക്കേറ്റു. ഇയാളെ രക്ഷപ്പെടുത്തി തൃപ്രയാർ ആക്ട്സ് പ്രവർത്തകർ വലപ്പാട് ദയ എമർജൻസി കെയറിൽ പ്രവേശിപ്പിച്ചു. വിവരമറിഞ്ഞ് സ്ഥലത്തെത്തിയ വലപ്പാട് പൊലീസും നാട്ടിക അഗ്നിരക്ഷ സേനയും ഏറെനേരം തിരച്ചിൽ നടത്തിയെങ്കിലും കൃതീഷിനെ കണ്ടെത്താനായില്ല. രാത്രിയായതോടെ തിരച്ചിൽ അവസാനിപ്പിക്കുകയായിരുന്നു. വെള്ളിയാഴ്ച രാവിലെയാണ് മൃതദേഹം കണ്ടെത്തിയത്. മാതാവ്: ഷൈലജ. സഹോദരൻ: കിഷോർ.