ഇരിങ്ങാലക്കുട: മാര്ക്കറ്റ് റോഡിലെ കുഴിയില് ബൈക്ക് വീണ് പരിക്കേറ്റ് യാത്രക്കാരൻ മരിച്ചു. മഠത്തിക്കര റോഡില് മുക്കുളം മോഹനന്റെ മകന് ബിജോയി (43) ആണ് മരിച്ചത്. ഞായറാഴ്ച രാത്രിയായിരുന്നു അപകടം. പിന്നിൽ വന്ന കാര് യാത്രക്കാരാണ് ഇയാളെ ഇരിങ്ങാലക്കുടയിലെ സ്വകാര്യ ആശുപത്രിയില് എത്തിച്ചത്. തിങ്കളാഴ്ച പുലര്ച്ചയാണ് മരിച്ചത്. ഹൃദയസ്തംഭനമാണ് മരണ കാരണമെന്നാണ് ആശുപത്രി വൃത്തങ്ങൾ ബന്ധുക്കള്ക്ക് നല്കിയ വിവരം. ഇതേ കാര്യമാണ് നഗരസഭ അധികൃതരും പറഞ്ഞത്. എന്നാൽ, പരിക്കിനെ തുടർന്നുണ്ടായ ആന്തരിക രക്തസ്രാവമാണ് മരണ കാരണമെന്നാണ് പോസ്റ്റ്മോര്ട്ടത്തിലെ പ്രാഥമിക നിഗമനം. പോസ്റ്റ്മോര്ട്ടത്തിന് ആദ്യം ഇരിങ്ങാലക്കുട ജനറല് ആശുപത്രിയിലാണ് എത്തിച്ചത്. മൃതദേഹ പരിശോധനയില് സംശയം തോന്നിയതോടെ മുളങ്കുന്നത്തുകാവ് ഗവ. മെഡിക്കല് കോളജ് ആശുപത്രിയിലേക്ക് മാറ്റുകയായിരുന്നു. അവിടെ നടത്തിയ പോസ്റ്റ്മോര്ട്ടത്തിലാണ് ആന്തരിക രക്തസ്രാവം ഉണ്ടായതായി വ്യക്തമായത്. മരണ കാരണം സംബന്ധിച്ച് കൂടുതല് വ്യക്തതക്കായി ആന്തരികാവയവങ്ങള് കാക്കനാട്ടെ ലാബിൽ പരിശോധനക്ക് അയച്ചിട്ടണ്ട്. ലോറി ഓണേഴ്സ് അസോസിയേഷന് ജില്ല എക്സിക്യൂട്ടിവ് അംഗവും ഇരിങ്ങാലക്കുട മേഖല ജോയന്റ് സെക്രട്ടറിയും എസ്.എന്.ബി.എസ് സമാജം ഡയറക്ടര് ബോര്ഡ് അംഗവും എസ്.എന്.ഡി.പി യോഗം വിശ്വനാഥപുരം ശാഖ മുൻ പ്രസിഡന്റുമാണ് ബിജോയി. മാതാവ്: സുഭദ്ര. മക്കള്: വിഘ്നേഷ്, വൈഷ്ണവ്.