വടക്കാഞ്ചേരി: തെക്കുംകര വട്ടായിയിൽ പ്രവർത്തനരഹിതമായ ക്വാറിയിലെ വെള്ളക്കെട്ടിൽ ചാടി യുവാവ് മരിച്ചു. വെളപ്പായ പുളിഞ്ചോട് ജനശക്തി റോഡിൽ പല്ലിശ്ശേരി വിത്സന്റെ മകൻ ജിനോയിയാണ് (23) മരിച്ചത്. വെള്ളിയാഴ്ച ഉച്ചക്ക് വീട്ടിൽനിന്ന് പി.എസ്.സി പരിശീലന ക്ലാസിലേക്ക് പോയ യുവാവിനെ പിന്നീട് കാണാതാവുകയായിരുന്നു. മാതാപിതാക്കൾ മെഡിക്കൽ കോളജ് പൊലീസിൽ പരാതി നൽകി അന്വേഷണം നടന്നുവരുകയായിരുന്നു. രാത്രി വീട്ടിൽനിന്ന് കിലോമീറ്ററുകൾ അകലെ വട്ടായി സ്വദേശിയുടെ ഉടമസ്ഥതയിലുള്ള ക്വാറിക്ക് സമീപം നാട്ടുകാർ സംശയാസ്പദ സാഹചര്യത്തിൽ കണ്ടെത്തിയിരുന്നു. അടുത്തെത്തിയതോടെ വെള്ളക്കെട്ടിലേക്ക് എടുത്ത് ചാടുകയായിരുന്നു. തുടർന്ന് പരിശോധന നടത്തിയെങ്കിലും കണ്ടെത്താനായില്ല. ശനിയാഴ്ച രാവിലെ അഗ്നിരക്ഷ സേന ഉദ്യോഗസ്ഥരെത്തിയാണ് മൃതദേഹം പുറത്തെടുത്തത്. മാനസിക വിഭ്രാന്തി പ്രകടിപ്പിച്ചിരുന്ന യുവാവ് ഒരുവർഷം മുമ്പ് മാതാപിതാക്കളെ വെട്ടി പരിക്കേൽപിച്ചിരുന്നു. മാതാവ്: ടെസി. സഹോദരൻ: ബിനോയ്.