ഒല്ലൂർ: കുട്ടനെല്ലൂരില്‍ വീടിന്റെ ചുമർ ഇടിഞ്ഞുവീണ് വയോധികക്ക് ദാരുണാന്ത്യം. കുട്ടനെല്ലൂര്‍ ഗ്രൗണ്ടിന് സമീപം തട്ടിൽ പാറയ്ക്കല്‍ വീട്ടില്‍ ട്രീസ (ത്രേസ്യാമ്മ -80) ആണ് മരിച്ചത്. ബുധനാഴ്ച രാവിലെ ഏഴോടെയായിരുന്നു അപകടം. പാചകത്തിനിടെ വീടിന്റെ അടുക്കളഭാഗത്തെ ചുമര്‍ ഇടിഞ്ഞുവീഴുകയായിരുന്നു. കാലപ്പഴക്കമുള്ള വീട്ടിൽ ഇവർ ഒറ്റക്കായിരുന്നു താമസം. വീടിന്റെ ഒരുഭാഗം അതിഥി തൊളിലാളിക്ക് വാടകക്ക് നല്‍കിയിരുന്നു. ഇവരാണ് അപകടവിവരം നാട്ടുകാരെ അറിയിച്ചത്. ഒല്ലൂര്‍ എ.സി.പി, സി.ഐ എന്നിവരുടെ നേതൃത്വത്തിലുള്ള പൊലീസ് സംഘം സ്ഥലത്തെത്തി. മൃതദേഹം പോസ്റ്റ്മോര്ട്ടത്തിനു ശേഷം സംസ്കരിച്ചു. ഭർത്താവ്: പരേതനായ ദേവസ്സി. മക്കൾ: ബിജോയ്, ബൈജു. മരുമക്കൾ: ജൂലി, ജെൻസി.
