ചാലക്കുടി: ആലുവക്കടുത്ത് ബൈക്കുകൾ കൂട്ടിയിടിച്ചുണ്ടായ അപകടത്തിൽ മേലൂർ സ്വദേശിയായ യുവതിക്ക് ദാരുണാന്ത്യം. മേലൂർ ശാന്തിപുരം ഡിവൈന് കോളനി പുന്നക്കുഴിയില് ജിജിയുടെയും ജോളിയുടെയും മകള് ലിയ ജിജിയാണ് (22) മരിച്ചത്. ബൈക്കോടിച്ച കൊരട്ടി സ്വദേശി പറമ്പി വീട്ടില് ജിബിൻ (23) ഗുരുതര പരിക്കേറ്റ് ചികിത്സയിലാണ്. ബുധനാഴ്ച പുലർച്ച ഒന്നേകാലോടെയായിരുന്നു അപകടം. ജിബിനൊപ്പം എറണാകുളത്തുനിന്ന് അങ്കമാലി ഭാഗത്തേക്ക് വരുകയായിരുന്നു ലിയ. കൂട്ടിയിടിയെത്തുടർന്ന് റോഡിലേക്ക് തെറിച്ചുവീണ് ഗുരുതര പരിക്കേറ്റതാണ് മരണ കാരണം. എറണാകുളത്ത് ഫാഷന് ഡിസൈനിങ് വിദ്യാർഥിയാണ് ലിയ. ഹോസ്റ്റലിലാണ് താമസം. കഴിഞ്ഞ തിങ്കളാഴ്ച നാട്ടില് വന്ന് ചൊവ്വാഴ്ച രാവിലെയാണ് എറണാകുളത്തേക്ക് തിരിച്ചുപോയത്. മാതാവ് ജോളിക്ക് കോതമംഗലത്ത് ഡോക്ടറെ കാണാന് കൂട്ടിന് പോകാന് ബുധനാഴ്ച പുലര്ച്ച അങ്കമാലിയില് എത്താമെന്ന് പറഞ്ഞതിനെത്തുടർന്നാണ് ജിബിനൊപ്പം യാത്ര തിരിച്ചത്. ലിയയുടെ പിതാവ് ജിജി ഓട്ടോഡ്രൈവറാണ്. ലിയയുടെ മകൾ: റോസ്മോൾ. സഹോദരി: ജൂലിയ. സംസ്കാരം വെള്ളിയാഴ്ച ഉച്ചക്ക് രണ്ടിന് പുളിയനം സെന്റ് മേരീസ് പള്ളി സെമിത്തേരിയിൽ.