എരുമപ്പെട്ടി: മകൾ കിണറ്റിൽ വീണതിന്റെ മനോവിഷമത്താൽ കുഴഞ്ഞുവീണ പിതാവ് മരിച്ചു. പാത്രമംഗലം തോന്നല്ലൂർ മത്തായിപ്പടി മൂത്തേടത്ത് വീട്ടിൽ ഹംസയാണ് (54) മരിച്ചത്. ഞായറാഴ്ച വൈകീട്ട് നാലരയോടെയാണ് സംഭവം. 15 വയസ്സുള്ള മകൾ ആൾമറയില്ലാത്ത വീട്ടുകിണറ്റിൽ വീഴുകയായിരുന്നു. വിവരമറിഞ്ഞതോടെ ഹൃദ്രോഗിയായ ഹംസ കുഴഞ്ഞുവീണു. ഉടൻ എരുമപ്പെട്ടി ആക്ട്സ് പ്രവർത്തകർ കുന്നംകുളം മലങ്കര ആശുപത്രിയിലെത്തിച്ചെങ്കിലും വഴിമധ്യേ മരിച്ചു. മൃതദേഹം പോസ്റ്റ്മോർട്ടത്തിന് ആശുപത്രി മോർച്ചറിയിലേക്ക് മാറ്റി. പെൺകുട്ടി കിണറ്റിൽ വീണപ്പോൾ നിലവിളി കേട്ട് ഓടിയെത്തിയ അയൽവാസിയായ ബക്കറാണ് കയറിൽ സാഹസികമായി കിണറ്റിലിറങ്ങി കുട്ടിയെ രക്ഷിച്ചത്. കുട്ടിക്ക് കാലിൽ പരിക്കുണ്ട്. ഹംസയുടെ ഭാര്യ: ഫാത്തിമ. മക്കൾ: ആഷിഖ്, ഹിബ. മരുമകൾ: ജാസ്മി.
