കാഞ്ഞങ്ങാട്: പള്ളിക്കരയിൽ വയനാട് സ്വദേശിയായ യുവതിയെ ട്രെയിനിൽനിന്ന് വീണ് മരിച്ചനിലയിൽ കണ്ടെത്തി. നേത്രാവതി എക്സ്പ്രസിൽ കഴിഞ്ഞ ദിവസം രാത്രിയിലാണ് അപകടം.
കൽപറ്റ കാവുംമന്ദം മഞ്ജു മലയിൽ വീട്ടിൽ എ.വി. ജോസഫിന്റെ മകൾ ഐശ്വര്യ ജോസഫ് (30) ആണ് മരിച്ചത്. പള്ളിക്കര മാസ്തിഗുഡയിൽ യുവതിയെ വീണുകിടക്കുന്ന നിലയിൽ കണ്ടെത്തുകയായിരുന്നു.
കാസർകോട് റെയിൽവേ പൊലീസ് ഒരാൾ ട്രെയിനിൽനിന്നും വീണിട്ടുണ്ടെന്ന് രാത്രി 10ഓടെ ബേക്കൽ പൊലീസിനെ അറിയിച്ചു. എസ്.ഐ കെ. ശ്രീജേഷിന്റെ നേതൃത്വത്തിൽ പൊലീസ് പാളത്തിൽ തിരച്ചിൽ നടത്തുകയും നാട്ടുകാരുടെ സഹായത്തോടെ കണ്ടെത്തുകയുമായിരുന്നു. തലക്കും മുഖത്തും കൈകാലുകളിലടക്കം പരിക്കേറ്റ യുവതിയെ കാസർകോട് ജനറൽ ആശുപത്രിയിലെത്തിച്ചെങ്കിലും മരിച്ചിരുന്നു. തൊട്ടടുത്തുനിന്നും ലഭിച്ച ഹാൻഡ് ബാഗും ഇതിനുള്ളിലുണ്ടായിരുന്ന പഴ്സും പരിശോധിച്ചതോടെയാണ് മരിച്ചയാളെ തിരിച്ചറിഞ്ഞത്. കാസർകോട് ജനറൽ ആശുപത്രിയിൽ ഉച്ചക്ക് പോസ്റ്റ്മോർട്ടം പൂർത്തിയാക്കി. അപകട മരണമറിഞ്ഞ് കൽപറ്റയിൽനിന്നും ബന്ധുക്കൾ കാസർകോട് എത്തിയിരുന്നു.
മൃതദേഹം നാട്ടിലേക്ക് കൊണ്ടുപോയി. നേത്രാവതിയിലുണ്ടായിരുന്ന റെയിൽവേ പൊലീസുകാർ ട്രെയിനിൽനിന്ന് യുവതി വീഴുന്നത് നേരിട്ടുകാണുകയും വിവരം കാസർകോട് റെയിൽവേ പൊലീസ് സ്റ്റേഷനിൽ അറിയിക്കുകയുമായിരുന്നു. കോഴിക്കോട്ടെ കമ്പനിയിൽ ജോലി ചെയ്യുന്ന യുവതി കമ്പനി ആവശ്യാർഥം മംഗളൂരുവിലേക്ക് പോകവേയാണ് അപകടം. യുവതിക്കൊപ്പം മറ്റാരുമുണ്ടായിരുന്നില്ല. വാതിൽപടിയിൽ നിൽക്കുന്നതിനിടെ അബദ്ധത്തിൽ വീഴുകയായിരുന്നുവെന്നാണ് പ്രാഥമിക നിഗമനം. അവിവാഹിതയാണ്. മാതാവ്: മോളി എന്ന ഹേമ.
