പൂക്കോട്ടൂര്‍: അന്തർ സംസ്ഥാന തൊഴിലാളിയുടെ മകളായ വിദ്യാര്‍ഥിനി മഞ്ഞപ്പിത്തം ബാധിച്ച് മരിച്ചു. കൊല്‍ക്കത്ത സ്വദേശി റബീബുല്‍ ഇസ്‍ലാമിന്റെയും മഹ്‌സബി ഇസ്‍ലാമിന്റെയും മകള്‍ ജന്നിഫറുല്‍ ഇസ്‍ലാം (14) ആണ് മരിച്ചത്. അറവങ്കര ന്യൂബസാറിലെ വാടക ക്വാര്‍ട്ടേഴ്‌സില്‍ കുടുംബത്തോടൊപ്പം കഴിയുകയായിരുന്ന ജന്നിഫറിനെ ജനുവരി നാലിന് കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരുന്നെങ്കിലും ചൊവ്വാഴ്ച രാവിലെ 8.45ന് മരിക്കുകയായിരുന്നു. പൂക്കോട്ടൂര്‍ ഗവ. ഹയര്‍ സെക്കന്‍ഡറി സ്കൂളിലെ എട്ടാം ക്ലാസ് വിദ്യാര്‍ഥിനിയാണ്. അറവങ്കരയിലെ ചെരിപ്പ് നിര്‍മാണ കമ്പനിയില്‍ ജോലി ചെയ്യുന്ന റബീബുല്‍ ഇസ്‍ലാം 20 വര്‍ഷം മുമ്പ് കുടുംബത്തോടൊപ്പം എത്തിയതാണ്. ജന്നിഫറിന്റെ ജനനവും പഠനവുമെല്ലാം അറവങ്കരയിലായിരുന്നു. മൃതദേഹം അറവങ്കര പാപ്പാട്ടുങ്ങല്‍ ജുമാ മസ്ജിദ് ഖബര്‍സ്ഥാനില്‍ ഖബറടക്കി. സഹോദരങ്ങള്‍: സൈബ ഇസ്‍ലാം, സയാന്‍ ഇസ്‍ലാം.
