അതിരപ്പിള്ളി: ആനമല റോഡ് നിർമാണത്തിനിടെ ഷോക്കേറ്റ് ഇതര സംസ്ഥാന തൊഴിലാളി മരിച്ചു. പശ്ചിമ ബംഗാൾ സ്വദേശി സിനറുൾ ഇസ്ലാമാണ് (21) മരിച്ചത്. രാവിലെ പുളിയിലപ്പാറ ഭാഗത്തായിരുന്നു അപകടം ഉണ്ടായത്. ദിവസങ്ങളായി ആനമല അന്തർ സംസ്ഥാനപാത മലക്കപ്പാറ വരെയുള്ള ചില ഭാഗങ്ങളിൽ ബി.സി ടാറിങ്ങ് നടക്കുന്നുണ്ട്. ഇതിലെ ജോലിക്കാരനായിരുന്നു സിനറുൾ. ജോലിക്കിടെ മെറ്റൽ തട്ടുന്ന ടിപ്പർ ലോറിയുടെ പിൻഭാഗം ഉയർത്തിയപ്പോൾ മുകളിലെ മരച്ചില്ലയിൽ തട്ടി. മരച്ചില്ല സമീപത്തെ 11 കെ.വി ലൈനിൽ തട്ടിനിൽക്കുകയായിരുന്നു. തുടർന്നാണ് ലോറിയിൽ പിടിച്ച് നിന്ന സിനറുളിന് ഗുരുതരമായ ഷോക്കേറ്റത്.