അന്തിക്കാട്: സഹോദരിയുടെ വീട്ടിലെ കിണറ്റിൽ വീണ ആട്ടിൻകുട്ടിയെ രക്ഷിക്കാനായി ഇറങ്ങിയയാൾ ശ്വാസംമുട്ടി മരിച്ചു. എടത്തിരുത്തി ചൂലൂർ കുട്ടമംഗലം കിഴക്ക് പോക്കാക്കില്ലത്ത് പരേതനായ ഹൈദ്രോസിന്റെ മകൻ അബ്ദുൽ റഷീദ് (48) ആണ് മരിച്ചത്. ഗൾഫിൽനിന്ന് ഒരു വർഷം മുമ്പ് നാട്ടിൽ വന്ന റഷീദ് വീടിന്റെ നിർമാണ പ്രവർത്തനം കാരണം പെരിങ്ങോട്ടുകര കരുവാംകുളത്തെ സഹോദരി ആരിഫയുടെ വീട്ടിലാണ് താമസം. ഞായറാഴ്ച വൈകീട്ട് 4.30ഓടെയായിരുന്നു സംഭവം. ആരിഫയുടെ വീട്ടിലെ ആട്ടിൻകുട്ടി കിണറ്റിൽ വീണതിനെ തുടർന്ന് രക്ഷിക്കാനായി ഇറങ്ങിയ റഷീദ് ഓക്സിജന്റെ കുറവുമൂലം ശ്വാസം കിട്ടാതെ കുഴഞ്ഞുവീഴുകയായിരുന്നു. വെള്ളത്തിൽ മുങ്ങിത്താഴ്ന്ന റഷീദിനെ തൃപ്രയാറിൽ നിന്ന് അഗ്നിരക്ഷസേന എത്തി പുറത്തെടുത്തെങ്കിലും മരിച്ചിരുന്നു. മൃതദേഹം പഴുവിൽ ആശുപത്രിയിലേക്ക് മാറ്റി. അബ്ദുൽ റഷീദ് പുതിയ വീട്ടിലേക്ക് താമസം മാറ്റാനിരിക്കെയാണ് മരണം. മാതാവ്: പരേതയായ നബീസ. മറ്റു സഹോദരങ്ങൾ: നസീമ, ആബിദ. ഖബറടക്കം തിങ്കളാഴ്ച ചൂലൂർ ജുമാ മസ്ജിദ് ഖബർസ്ഥാനിൽ.