പരപ്പനങ്ങാടി: ലോറിയിടിച്ച് സ്‌കൂട്ടര്‍ യാത്രികൻ മരിച്ചു. ചെറമംഗലം കുരുക്കള്‍ റോഡ് സ്വദേശി സൈദു ഹാജിക്കാണ് (70) ദാരുണാന്ത്യം. വെള്ളിയാഴ്ച പകല്‍ 9.30ഓടെ പോളിങ് ബൂത്തായ ബി.ഇ.എം എല്‍.പി സ്‌കൂളിന് സമീപമായിരുന്നു അപകടം. വോട്ട് രേഖപ്പെടുത്താൻ വരുകയായിരുന്നു സൈദു ഹാജി. ലോറി ആംബുലന്‍സിന് അരിക് കൊടുക്കുന്നതിനിടെ മുന്നില്‍ സഞ്ചരിച്ച സ്‌കൂട്ടറില്‍ ഇടിക്കുകയായിരുന്നു. ലോറി ശരീരത്തിലൂടെ കയറിയിറങ്ങി ഗുരുതര പരിക്കേറ്റ ഇദ്ദേഹത്തെ ആദ്യം സമീപത്തെ സ്വകാര്യ ആശുപത്രിയിലും അവിടെനിന്ന് കോട്ടക്കലിലെ ആശുപത്രിയിലേക്കും കൊണ്ടുപോയെങ്കിലും രക്ഷിക്കാനായില്ല. തിരൂരങ്ങാടി താലൂക്ക് ആശുപത്രിയിൽ പോസ്റ്റ്മോർട്ടത്തിനുശേഷം കെട്ടുങ്ങൽ ഖബർസ്ഥാനിൽ ഖബറടക്കും. ഭാര്യ: റസിയ. മക്കൾ: ബാബു മോൻ, അർഷാദ്, ഷെഫിനീത്, അബ്ദുൽ ഗഫൂർ, ഹസീന, ഷെറീന. മരുമക്കൾ: ഹാജറ, സെലീന, ജാസ്മിൻ, മുർഷിദ.
