കാസർകോട്: ബേഡഡുക്ക ബേത്തൂർപാറയിൽ സ്കൂട്ടറും കാറും കൂട്ടിയിടിച്ച് ദമ്പതികൾ മരിച്ചു. കേരള വ്യാപാരി വ്യവസായി ബന്തടുക്ക യൂനിറ്റ് പ്രസിഡൻറും ബന്തടുക്കയിലെ വസ്ത്രവ്യാപാരിയുമായ കുഞ്ഞികൃഷ്ണൻ (62), ഭാര്യ ചിത്ര (58) എന്നിവരാണ് മരിച്ചത്. ഞായറാഴ്ച എട്ടരയോടെയാണ് അപകടം. സ്കൂട്ടറിൽ ഭാര്യയുമായി കല്യാണത്തിന് പോകുമ്പോൾ കുമ്പള ഭാഗത്തുനിന്നുവന്ന കാർ ഇടിച്ചാണ് അപകടം. പരിക്കേറ്റവരെ ഉടൻ ബേഡഡുക്ക താലൂക്ക് ആശുപത്രിയിലെത്തിച്ചെങ്കിലും മരിച്ചിരുന്നു. അപകടം വരുത്തിയ കാർ പിന്നീട് റോഡരികിലെ കുന്നിൽ ഇടിച്ചാണ് നിന്നത്. ബേഡഡുക്ക പൊലീസ് ഇൻക്വസ്റ്റ് നടത്തി മൃതദേഹങ്ങൾ കാസർകോട് ജനറൽ ആശുപത്രിയിൽ പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുകൊടുത്തു.
