മഞ്ചേരി: സ്കൂട്ടറും മിനി ഓട്ടോയും കൂട്ടിയിടിച്ച് സ്കൂട്ടർ യാത്രക്കാരനായ യുവാവ് മരിച്ചു. പുൽപറ്റ വെള്ളം കുന്നൻ അബ്ദുറഹ്മാന്റെ മകൻ മുഹമ്മദ് അഷ്റഫാണ് (37) മരിച്ചത്. മഞ്ചേരി- അരീക്കോട് റോഡിൽ പുല്ലൂർ പള്ളിക്ക് സമീപം ഞായറാഴ്ച ഉച്ചക്ക് 12. 45 നായിരുന്നു അപകടം.
മഞ്ചേരിയിൽ നിന്നും അരീക്കോട് ഭാഗത്തേക്ക് പോവുകയായിരുന്ന സ്കൂട്ടറും എതിർദിശയിൽ നിന്നും വന്ന മിനി ഓട്ടോയും കൂട്ടിയിടിക്കുകയായിരുന്നു. അഷ്റഫിനെ ഉടൻ മഞ്ചേരി ഗവ. മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഓട്ടോറിക്ഷ ഡ്രൈവറാണ് അഷ്റഫ്. ഓട്ടോറിക്ഷ മഞ്ചേരിയിലെ വർക്ക്ഷോപ്പിൽ നൽകിയ ശേഷം തിരികെ വരുമ്പോഴായിരുന്നു അപകടം. കഴിഞ്ഞ ദിവസം ആരോഗ്യ മന്ത്രി വീണ ജോർജ് സഞ്ചരിച്ച കാറും ഇവിടെ അപകടത്തിൽപ്പെട്ടിരുന്നു. സ്കൂട്ടറുകളിൽ ഇടിച്ചായിരുന്നു അപകടം. സ്കൂട്ടർ യാത്രക്കാരായ രണ്ട് പേർക്ക് ഗുരുതരമായി പരിക്കേറ്റിരുന്നു. ആയിശുമ്മയാണ് അഷ്റഫിന്റെ മാതാവ്.
ഭാര്യ: റസീന. മക്കൾ: ഹയാൻ, ഫൈസീൻ, ഫാത്തിമ മിസ്‌ല. സഹോദരങ്ങൾ: റഷീദ്, സലാം, റഫീഖത്ത്, സഫിയ.
