കാഞ്ഞങ്ങാട്: സ്കൂൾ ബസിടിച്ച് വഴിയാത്രക്കാരൻ മരിച്ചു. അജാനൂർ കിഴക്കുംകര മണലിലെ എം. കൃഷ്ണൻ (75) ആണ് മരിച്ചത്. നോർത്ത് കോട്ടച്ചേരിയിൽ സംസ്ഥാന പാതയിലൂടെ നടന്നുപോകവേ സ്കൂൾ ബസ് ഇടിക്കുകയായിരുന്നു. കോട്ടച്ചേരിയിലെ സ്വകാര്യ ആശുപത്രിയിലെത്തിച്ചെങ്കിലും മരിച്ചു. വ്യാഴാഴ്ച വൈകീട്ട് നാലോടെയായിരുന്നു അപകടം. നിയന്ത്രണം വിട്ട സ്കൂൾ ബസ് നിർത്തിയിട്ട കാറിലും സ്കൂട്ടറിലും ഇടിച്ചു. രജിസ്ട്രേഷൻ ആകാത്ത കാറിനു പിന്നിലാണ് ഇടിച്ചത്. ചിത്താരി അസീസിയ ഇംഗ്ലീഷ് മീഡിയം സ്കൂളിന്റെ ബസാണ് അപകടത്തിൽപെട്ടത്. കുട്ടികൾക്ക് പരിക്കില്ല. വിരമിച്ച ദിനേശ് ബീഡി തൊഴിലാളിയായിരുന്നു. അവിവാഹിതനാണ്. പരേതരായ ആലാമി- മാണിക്യം ദമ്പതികളുടെ മകനാണ്. സഹോദരങ്ങൾ: കമ്മാടത്തു, ശാരദ, മാധവി, രാമൻ, അശോകൻ. സംസ്കാരം വെള്ളിയാഴ്ച.
