പെരുമ്പാവൂർ: നിയന്ത്രണംവിട്ട ബൈക്ക് പാലത്തിന്റെ കൈവരിയിലിടിച്ച് യുവാവ് മരിച്ചു. പിന്നിൽ സഞ്ചരിച്ചയാൾക്ക് ഗുരുതര പരിക്കേറ്റു. ഈസ്റ്റ് ഒക്കൽ വടക്കൻ വീട്ടിൽ കുഞ്ഞുമുഹമ്മദിന്‍റെ മകൻ അലി അക്ബറാണ് (അക്കു -32) മരിച്ചത്. ഒക്കൽ മുളാടൻ വീട്ടിൽ അലിയുടെ മകൻ അബിനാസ് അലിക്ക് (30) പരിക്കേറ്റു. വല്ലം-പാറപ്പുറം പുതിയ പാലത്തിന് സമീപം ചൊവ്വാഴ്ച വൈകീട്ട് മൂന്നിനായിരുന്നു അപകടം. കാഞ്ഞൂർ ഭാഗത്തുനിന്ന് വല്ലത്തേക്ക് പോകുമ്പോഴായിരുന്നു അപകടം. അബിനാസ് അലി ബൈക്കിൽനിന്ന് 25 അടി താഴ്ചയുള്ള ഓവുങ്ങതോട്ടിലേക്കും അലി അക്ബർ റോഡിലേക്കും തെറിച്ചു വീഴുകയായിരുന്നു. ഇരുവരെയും എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും അലി അക്ബറിനെ രക്ഷിക്കാനായില്ല. അലി അക്ബർ അവിവാഹിതനാണ്. മാതാവ്: സൈനബ. സഹോദരങ്ങൾ: അലി അസ്ഹർ, ഫാത്തിമ. ഖബറടക്കം ബുധാനാഴ്ച ഉച്ചക്കുശേഷം.
