ആലത്തൂർ: രണ്ടാം ക്ലാസ് വിദ്യാർഥി വീടിനടുത്ത വയലിലെ കുഴിയിലെ വെള്ളക്കെട്ടിൽ മുങ്ങി മരിച്ചു. തോണിപ്പാടം നെല്ലിപ്പാടത്ത് ജിനൂസിന്റെ മകൻ ബിലാലാണ് (ഏഴ്) മരിച്ചത്. കുട്ടി ഒറ്റക്ക് സൈക്കിളുമായി കളിക്കാൻ പോയതായിരുന്നു. വ്യാഴാഴ്ച വൈകീട്ട് അഞ്ചു മണിയോടെ കനാൽ ബണ്ടിൽ സൈക്കിളും താഴെ കുഴിയുടെ കരയിൽ ഒരു ചെരിപ്പും മറ്റൊരു ചെരിപ്പ് വെള്ളത്തിലും കിടക്കുന്നതുകണ്ട് സംശയം തോന്നി നടത്തിയ തിരച്ചിലിലാണ് വെള്ളത്തിൽ മുങ്ങിക്കിടക്കുന്നത് കണ്ടത്. ഉടൻ പുറത്തെടുത്ത് ആലത്തൂർ താലൂക്കാശുപത്രിയിൽ എത്തിച്ചെങ്കിലും മരിച്ചിരുന്നു. അത്തിപ്പൊറ്റ കെ.എം.എം.എൽ.പി സ്കൂളിലെ വിദ്യാർഥിയാണ്. മാതാവ്: ആബിദ. ഇവരുടെ ഏക മകനാണ് ബിലാൽ. മൃതദേഹം താലൂക്കാശുപത്രി മോർച്ചറിയിൽ. മറ്റ് നടപടികൾ വെള്ളിയാഴ്ച രാവിലെ നടക്കും.
