പത്തിരിപ്പാല: സംസ്ഥാനപാത മങ്കര തിയറ്ററിനു സമീപം സ്വകാര്യ ബസും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. തൃശൂർ ചേലക്കര തൊഴുപ്പാടം ഒരവിങ്ങൽ വീട്ടിൽ സുരേഷ് കുമാറിന്‍റെ മകൻ ഒ.എസ്. സുജിത് (20) ആണ് മരിച്ചത്. ബുധനാഴ്ച രാത്രി 7.20ഓടെയാണ് അപകടം. ഗുരുവായൂരിൽനിന്ന് പാലക്കാട്ടേക്കു പോകുന്ന സ്വകാര്യ ബസും എതിരെവന്ന ബൈക്കുമാണ് അപകടത്തിൽപെട്ടത്. മെക്കാനിക്കൽ ജോലി കഴിഞ്ഞ് വീട്ടിലേക്ക് മടങ്ങുമ്പോഴാണ് അപകടം. സാരമായി പരിക്കേറ്റ യുവാവിനെ പത്തിരിപ്പാല സ്വകാര്യ ആശുപത്രിയിലും തുടർന്ന് ജില്ല ആശുപത്രിയിലും എത്തിച്ചെങ്കിലും രക്ഷിക്കാനായില്ല. മൃതദേഹം ജില്ല ആശുപത്രി മോർച്ചറിയിൽ. വ്യാഴാഴ്ച രാവിലെ പൊലീസ് നടപടികൾക്കുശേഷം പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകും. മാതാവ്: സിന്ധു. സഹോദരങ്ങൾ: അഭിജിത്, ശരത്.
