പട്ടാമ്പി: ലോറിയുമായി കൂട്ടിയിടിച്ച് ബൈക്ക് യാത്രികനായ കോളജ് വിദ്യാർഥി മരിച്ചു. കൈപ്പുറം പാലാട്ടുതൊടി സുൽഫിക്കറലിയുടെ മകൻ മുഹമ്മദ് സഫ്വാൻ (21) ആണ് മരിച്ചത്. ബൈക്കിൽ കൂടെയുണ്ടായിരുന്ന സുഹൃത്തിന് പരിക്കുണ്ട്.
തിങ്കളാഴ്ച രാവിലെ ഒമ്പതരയോടെ വലിയകുന്ന് പൂക്കാട്ടിരി റോഡിലാണ് അപകടം. ലോറിയുടെ പിറകിൽ ബൈക്ക് ഇടിക്കുകയായിരുന്നു. ഉടൻ വളാഞ്ചേരിയിലെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. സഫ്വാൻ പൂക്കാട്ടിരി സഫാ കോളജിലെ രണ്ടാംവർഷ ഡിഗ്രി വിദ്യാർഥിയാണ്. വളാഞ്ചേരി പൊലീസ് ഇൻക്വസ്റ്റ് നടത്തി മൃതദേഹം തിരൂർ ജില്ല ആശുപത്രിയിലേക്ക് മാറ്റി.
മാതാവ്: ഉമ്മു ഹബീബ. സഹോദരങ്ങൾ: മുഹമ്മദ് സഫ്നീദ്, മുഹമ്മദ് ഷാനിബ്, ഷസ. പോസ്റ്റ്മോർട്ടത്തിനുശേഷം ചൊവ്വാഴ്ച ഉച്ചക്ക് 12.30ന് കൈപ്പുറം ജുമാമസ്ജിദ് ഖബർസ്ഥാനിൽ ഖബറടക്കും.
