പെരുമ്പാവൂര്‍: ഭാര്യയെ വെട്ടിക്കൊലപ്പെടുത്തിയശേഷം ഒഡിഷക്കാരനായ യുവാവ് തൂങ്ങിമരിച്ചു. കുറുപ്പംപടി പൊലീസ് സ്‌റ്റേഷന്‍പരിധിയിൽ നൂലേലി പള്ളിപ്പടിക്കുസമീപം വാടകക്ക് താമസിക്കുകയായിരുന്ന വിഷ്ണുകാരത് പ്രധാനാണ് (26), ഭാര്യ സിലയെ (23) കൊലപ്പെടുത്തിയ ശേഷം മുറിയിലെ ജനല്‍ക്കമ്പിയില്‍ തൂങ്ങിമരിച്ചത്. ഓടക്കാലിയിലെ പ്ലൈവുഡ് കമ്പനിയില്‍ തൊഴിലാളികളായിരുന്നു ഇരുവരും. രാവിലെ സമീപത്തെ ടാപ്പില്‍ വെള്ളം എടുക്കാൻ കാണാത്തതിനെതുടര്‍ന്ന് തൊട്ടടുത്ത മുറിയില്‍ താമസിക്കുന്ന അന്തര്‍സംസ്ഥാനക്കാരിയായ യുവതി ചെന്നുനോക്കിയപ്പോഴാണ് വിഷ്ണുകാരതിനെ തൂങ്ങിയനിലയില്‍ കണ്ടത്. ഇവര്‍ വിവരം കെട്ടിട ഉടമയെ അറിയിച്ചു. പിന്നീട് പൊലീസെത്തി പരിശോധിച്ചപ്പോഴാണ് മുറിയില്‍ സിലയെ വെട്ടേറ്റ് മരിച്ചനിലയില്‍ കണ്ടെത്തിയത്. ഒരുമാസം മുമ്പാണ് ഇവര്‍ ഇവിടെ ജോലിക്കെത്തിയത്. ദമ്പതികള്‍ തമ്മില്‍ സ്ഥിരം കലഹിച്ചിരുന്നതായി പൊലീസ് പറഞ്ഞു. ഫോറന്‍സിക് വിദഗ്ധര്‍ ഉൾപ്പെടെ സ്ഥലത്തെത്തി പരിശോധന നടത്തി. കോവിഡ് ടെസ്റ്റിനും പോസ്റ്റ്മോര്‍ട്ടത്തിനുമായി മൃതദേഹങ്ങള്‍ കളമശ്ശേരി മെഡിക്കല്‍ കോളജ് ആശുപത്രിയിലേക്ക് മാറ്റിയിരിക്കുകയാണ്.
