കോയമ്പത്തൂർ: കാട്ടാനയുടെ ആക്രമണത്തിൽ ഇതരസംസ്ഥാന തൊഴിലാളിയായ യുവാവ് കൊല്ലപ്പെട്ടു. കോയമ്പത്തൂർ തുടിയല്ലൂർ പെരിയതടാകത്തിലെ സ്വകാര്യ ഇഷ്ടിക നിർമാണ കേന്ദ്രത്തിലെ തൊഴിലാളിയായ ഒഡിഷ സ്വദേശി എൻ. ബാബുൽ ഹുസൈൻ (23) ആണ് മരിച്ചത്. വനഭാഗത്തുനിന്ന് ഒന്നര കിലോമീറ്റർ അകലെയുള്ള ഇഷ്ടിക കളത്തിലെ താൽക്കാലിക മുറികളിലാണ് തൊഴിലാളികൾ താമസിച്ചിരുന്നത്. ശനിയാഴ്ച രാവിലെ ആറരയോടെയാണ് കാട്ടുകൊമ്പൻ എത്തിയത്. വനം അധികൃതരും നാട്ടുകാരും ചേർന്ന് വനത്തിലേക്ക് തുരത്തിയോടിക്കാൻ ശ്രമിക്കുന്നതിനിടെയാണ് ഹുസൈനെ ആക്രമിച്ചത്. ഗുരുതരമായി പരിക്കേറ്റ നിലയിൽ ആശുപത്രിയിലെത്തിച്ചെങ്കിലും രക്ഷിക്കാനായില്ല.
