പള്ളിക്കൽ (മലപ്പുറം): പള്ളിക്കൽ കൂട്ടാലുങ്ങൽ നെല്ലേങ്ങര കുഞ്ഞാലൻകുട്ടിയുടെ ഭാര്യ പൊയ്ലി നഫീസ (52) കോവിഡ് ബാധിച്ച് മരിച്ചു. ഇതോടെ ജില്ലയിൽ കോവിഡ് ബാധിച്ച് മരിച്ചവരുടെ എണ്ണം പതിനേഴായി. പള്ളിക്കൽ പഞ്ചായത്തിലെ രണ്ടാമത്തെ കോവിഡ് മരണമാണിത്. പ്രമേഹം, രക്ത സമ്മർദം, വൃക്ക സംബന്ധമായ രോഗം എന്നിവ അലട്ടിയിരുന്ന നഫീസ സമ്പർക്കത്തിലൂടെയാണ് രോഗബാധിതയായത്. പനിയും ശ്വാസതടസ്സവും അനുഭവപ്പെട്ടതിനെ തുടർന്ന് ജൂലൈ 24നാണ് നഫീസയെ മഞ്ചേരി മെഡിക്കൽ കോളജിൽ പ്രവേശിപ്പിച്ചത്. രോഗം സ്ഥിരീകരിച്ചതോടെ കോവിഡ് ഐ.സി.യുവിലേക്ക് മാറ്റി. ആഗസ്റ്റ് എട്ടിന് രാവിലെയാണ് മരിച്ചത്. ഇവരുടെ കുടുംബാംഗങ്ങളായ നാല്‌ പേർ കോവിഡ് സ്ഥിരീകരിച്ച് മഞ്ചേരി മെഡിക്കൽ കോളജിൽ ചികിത്സയിലാണ്. മക്കൾ: റഫീഖ് (കുഞ്ഞാപ്പു) അനീസ്, ശൈജു ബാബു, നസീമ , നസീറ, സലീന. മരുമക്കൾ: അബ്ദുൽ ഹമീദ് അരീക്കോട്, സിദ്ധീഖ് കിഴിശ്ശേരി, ഷബീറലി കൊണ്ടോട്ടി, സജ്ന, ആയിശാബി, ഹസീന.
