നടുവണ്ണൂർ: പാർസൽ ഭക്ഷണം കൊണ്ടുപോവുകയായിരുന്ന സ്കൂട്ടറിനു പിന്നിൽ ജീപ്പിടിച്ച് സ്കൂട്ടർ യാത്രക്കാരനായ യുവാവ് മരിച്ചു. കരുമ്പാപ്പൊയിൽ നൊസ്റ്റാൾജിക് ഇന്നിലെ ഡെലിവറിബോയ് കാവുന്തറ പള്ളിയത്തുകുനിയിലെ പുത്തലത്ത് മുഹമ്മദ് ഷഹൽ (18) ആണ് മരിച്ചത്. ഞായറാഴ്ച രാത്രി ഒമ്പതിനാണ് അപകടം. കരുമ്പാപ്പൊയിലിൽനിന്ന് പള്ളിയത്തുകുനി ഭാഗത്തേക്കു പോവുകയായിരുന്നു സ്കൂട്ടർ. അതേ ദിശയിൽ വന്ന ജീപ്പാണ് ഇടിച്ചത്. ഇടിച്ച ജീപ്പ് നിർത്താതെ പോയെന്ന് കണ്ടുനിന്നവർ പറഞ്ഞു. അതുവഴി വാഹനത്തിൽ വന്നവരാണ് ജീപ്പിെൻറ നമ്പർ കുറിച്ചെടുത്തത്. മൊടക്കല്ലൂരിലെ സ്വകാര്യ ആശുപത്രിയിലും തുടർന്ന് കോഴിക്കോെട്ട സ്വകാര്യ ആശുപത്രിയിലും എത്തിച്ചെങ്കിലും രക്ഷിക്കാനായില്ല. പോസ്റ്റ്മോർട്ടത്തിനും കോവിഡ് ടെസ്റ്റിനുംശേഷം തിങ്കളാഴ്ച മൂന്നരയോടെ എലങ്കമൽ ജുമാമസ്ജിദ് ഖബർസ്ഥാനിൽ ഖബറടക്കി. അബ്ദുൽ ഹമീദിെൻറയും റഷീദയുടെയും മകനാണ്. സഹോദരങ്ങൾ: ഷമീമ നസ്റിൻ (എം.എൽ.ടി വിദ്യാർഥിനി, വൊക്കേഷനൽ വനിത കോളജ്, പേരാമ്പ്ര), ഷെഹന ഷെറിൻ (കാവുന്തറ എ.യു.പി സ്കൂൾ വിദ്യാർഥിനി). എം.എസ്.എഫ് പള്ളിയത്തുകുനി ശാഖാ വൈസ് പ്രസിഡൻറായിരുന്നു. അരിക്കുളം ഹയർ സെക്കൻഡറി സ്കൂളിൽ പ്ലസ് ടു കഴിഞ്ഞതിനുശേഷം ക്ലാസ് തുടങ്ങുന്നതിെൻറ ഇടവേളയിൽ കുടുംബം പുലർത്താൻ ഭക്ഷണവിതരണജോലി ചെയ്യുകയായിരുന്നു.