കങ്ങഴ: വാനിടിച്ചുണ്ടായ അപകടത്തിൽ പരിക്കേറ്റ് ചികിത്സയിൽ കഴിഞ്ഞ യുവാവ് മരിച്ചു. കങ്ങഴ കുമ്പന്താനം ബിജു തോമസാണ് (42)മരിച്ചത്. തിങ്കളാഴ്ച രാത്രി 8.30ന് മൂലേപ്പീടിക-പൂവത്തുംകുഴി റോഡിൽ കാരയ്ക്കാട്ടുപടിയിലായിരുന്നു അപകടം. റോഡരികിൽ ബൈക്ക് പാർക്ക് ചെയ്തശേഷം സുഹൃത്തുമായി സംസാരിച്ച് നിൽക്കുമ്പോൾ വാൻ ബിജുവിനെ ഇടിച്ചുതെറിപ്പിച്ചശേഷം സമീപത്തെ വീടിെൻറ മതിലും വൈദ്യുതിപോസ്റ്റും ഇടിച്ചുതകർത്തു. ആളുകൾ ഓടിക്കൂടിയപ്പോൾ ഡ്രൈവർ വാനുമായി കടന്നുകളഞ്ഞു. വാനിൽനിന്ന് തെറിച്ചുവീണ മൊബൈൽ ഫോൺ നാട്ടുകാർ മണിമല പൊലീസിൽ ഏൽപിച്ചു. ഫോൺ കേന്ദ്രീകരിച്ച് നടത്തിയ അന്വേഷണത്തിൽ ഡ്രൈവറെ പിടികൂടി. ഗുരുതര പരിക്കേറ്റ ബിജുവിനെ നാട്ടുകാർ പാമ്പാടി താലൂക്ക് ആശുപത്രിയിലും തുടർന്ന് എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചു.
ചികിത്സയിൽ കഴിയവെ ബുധനാഴ്ച പുലർച്ചയാണ് മരിച്ചത്. മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകി. ഭാര്യ: ജയമോൾ. മക്കൾ: സെമിര, സെഫിൻ, ഷാരോൺ. സംസ്‌കാരം വ്യാഴാഴ്ച ഉച്ചക്ക് 12ന് ഉദയപുരം ബ്രദറൺ സെമിത്തേരിയിൽ.
