വണ്ടൂർ: സൗദിയിൽനിന്ന് വന്ന് ക്വാറൻറീനിൽ കഴിയുകയായിരുന്ന യുവാവിനെ മരിച്ച നിലയിൽ കണ്ടെത്തി. കാപ്പിച്ചാൽ മാരാൻതൊടിക അയ്യൂബാണ് (43) മരിച്ചത്. സൗദിയിൽ ഹാർഡ്വെയർ സ്ഥാപനത്തിൽ ജീവനക്കാരനായ അയ്യൂബ് കഴിഞ്ഞ മാസം 29നാണ് നാട്ടിലെത്തിയത്. തുടർന്ന് കൂളിക്കാട്ടുപാടിയിലെ ക്വാറൻറീൻ കേന്ദ്രത്തിൽ നിരീക്ഷണത്തിൽ തുടരുകയായിരുന്നു. നേരത്തേ ഹൃദയ സംബന്ധമായ അസുഖം ഉണ്ടായിരുന്നു. ശനിയാഴ്ച രാവിലെ 11.30ഓടെ വീട്ടുകാർ വന്ന് ഭക്ഷണം നൽകുകയും ബാൽക്കണിയിൽനിന്ന് സംസാരിക്കുകയും ചെയ്തിരുന്നു. തുടർന്ന് കുളിക്കാൻ വേണ്ടി ബാത്ത്റൂമിൽ കയറിയതാണ്. ഉച്ച ഭക്ഷണത്തിനായി വിളിച്ചപ്പോൾ വാതിൽ തുറക്കാത്തതിനാൽ കൂടെ നിരീക്ഷണത്തിൽ കഴിയുന്നവർ കയറി നോക്കിയപ്പോഴാണ് അബോധാവസ്ഥയിൽ കുളിമുറിയിൽ കിടക്കുന്നത് കണ്ടത്. ഉടനെ മഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും മരിച്ചു. കോവിഡ് പരിശോധന ഫലം ലഭിച്ച ശേഷം തുടർനടപടികൾ സ്വീകരിക്കും. കൊന്നഞ്ചേരി പാത്തുമ്മക്കുട്ടിയാണ് മാതാവ്. ഭാര്യ: നശീദ. മക്കൾ: ദിയ, ഹാഷിം ഖാൻ.