ആറാട്ടുപുഴ: വീട്ടിലെ കിടപ്പുമുറിയിൽ മരിച്ചനിലയിൽ കണ്ടെത്തിയ സ്ത്രീക്ക് കോവിഡ്. മുതുകുളം തെക്ക് ദേവികയിൽ റിട്ട. പോസ്റ്റ് മാസ്റ്റർ പരേതനായ രാധാകൃഷ്ണപിള്ളയുടെ ഭാര്യ ആനന്ദവല്ലിയമ്മയെ (66) വെള്ളിയാഴ്ച ഉച്ചയോടെയാണ് മരിച്ചനിലയിൽ കണ്ടത്. ഇവർ വീട്ടിൽ ഒറ്റക്ക് താമസിച്ചുവരുകയായിരുന്നു. വണ്ടാനം മെഡിക്കൽ കോളജ് ആശുപത്രിയിൽ നടത്തിയ പരിശോധനയിലാണ് കോവിഡ് സ്ഥിരീകരിച്ചത്. ആദ്യം കായംകുളം താലൂക്ക് ആശുപത്രിയിൽ നടത്തിയ ആൻറിജൻ പരിശോധനഫലം നെഗറ്റിവായിരുന്നു. മരണകാരണം കോവിഡല്ലെന്ന് പറയുന്നു. വീഴ്ചയിൽ കഴുത്തിനേറ്റ ക്ഷതമാണ് മരണകാരണമായതെന്നാണ് പ്രാഥമികപരിശോധന വിവരം.
