ചങ്ങരംകുളം: കാണാതായയാളുടെ മൃതദേഹം കിണറ്റില്‍ കണ്ടെത്തി. കൊഴിക്കരയില്‍ കള്ളുഷാപ്പ് ജീവനക്കാരനും ആലേങ്കാട് ഉദിനുപറമ്പ് താമസിക്കാരനുമായ തലശ്ശരാത്ത് വളപ്പില്‍ ശിവദാസന്‍നെയാണ് (53) ദുരൂഹ സാഹചര്യത്തിൽ മരിച്ച നിലയില്‍ കണ്ടെത്തിയത്.
തിങ്കളാഴ്ച രാത്രി ഷാപ്പ് അടച്ച് വീട്ടില്‍ എത്താന്‍ വൈകിയതിനെ തുടര്‍ന്ന് ബന്ധുക്കള്‍ തിരച്ചില്‍ നടത്തുന്നതിനിടെ വഴിയരികലെ ഒഴിഞ്ഞ പറമ്പിലെ കിണറ്റില്‍ ശിവദാസെൻറ ചെരിപ്പും ബാഗും കണ്ടെത്തിയിരുന്നു. സമീപത്ത് രക്തക്കറ സംശയിക്കുന്ന പൊട്ടിയ ബിയര്‍ ബോട്ടിലും കണ്ടെത്തിയതോടെ പൊലീസും ഫയര്‍ഫോഴ്സും സ്ഥലത്തെത്തി. ചൊവ്വാഴ്ച പുലര്‍ച്ച നാട്ടുകാരും പൊലീസും കിണറ്റിലെ വെള്ളം വറ്റിച്ച് നടത്തിയ പരിശോധനയിലാണ് മൃതദേഹം കണ്ടെത്തിയത്. മുന്‍ തൃത്താല എം.എല്‍.എ കുഞ്ഞുണ്ണിയുടെ സഹോദരീഭര്‍ത്താവാണ് ശിവദാസന്‍. ഷൊര്‍ണൂര്‍ ഡിവൈ.എസ്.പി എന്‍. മുരളീധരന്‍, ചാലിശ്ശേരി സി.ഐ എ. പ്രതാപ് എന്നിവരുടെ നേതൃത്വത്തില്‍ സംഭവസ്ഥലത്ത് പരിശോധന നടത്തി. ഭാര്യ: രജനി. മക്കള്‍: ശരത്ത്, രാഹുല്‍. സഹോദങ്ങള്‍: ചന്ദ്രന്‍, ബാലന്‍, മണികണ്ഠന്‍, രാജന്‍, ഗിരീഷ്, സുരേഷ്.
