നിർത്താതെപോയ വാഹനം പിടികൂടി
വാടാനപ്പള്ളി: പുലർച്ചെ നടക്കാനിറങ്ങിയ വയോധികൻ ബൈക്കിടിച്ച് മരിച്ചു. തളിക്കുളം എടശ്ശേരി ബീച്ചിൽ താമസിക്കുന്ന നെടുമ്പാറൻ വീട്ടിൽ വാസുദേവൻ (78) ആണ് മരിച്ചത്. പരിശോധനയിൽ ഇദ്ദേഹത്തിന് കോവിഡ് സ്ഥിരീരിച്ചു. ഞായറാഴ്ച പുലർച്ചെ 5.30 ഓടെയാണ് സവാരിക്കിറങ്ങിയത്. എടശേരി ബീച്ചിൽ വാഹനമിടിച്ച് റോഡിൽ കിടക്കുന്നത് വഴിയാത്രക്കാരാണ് കണ്ടത്. ഇയാളെ ആദ്യം വെസ്റ്റ് ഫോർട്ട് ആശുപത്രിയിലും പിന്നീട് മെഡിക്കൽ കോളജ് ആശുപത്രിയിലേക്ക് കൊണ്ടുപോകും വഴി രാവിലെ 8.30 ഓടെ മരിക്കുകയായിരുന്നു. സംഭവസ്ഥലത്ത് നിന്ന് ബൈക്ക് നിർത്താതെ ഓടിച്ചു പോയ ആളുടെ ആധാർ കാർഡും മൊബൈൽ ഫോണും ലഭിച്ചിരുന്നു. ഇതനുസരിച്ച് വാഹനം ഓടിച്ചിരുന്ന തിരുവനന്തപുരം സ്വദേശിയും ഇപ്പോൾ നാട്ടിക ബീച്ച് പോസ്റ്റോഫിസിന് സമീപം താമസിക്കുന്ന രജേഷ് കുമാറിനെയും(38) ഇയാളുടെ ബൈക്കും വാടാനപ്പള്ളി പൊലീസ് കസ്റ്റഡിയിൽ എടുത്തു.
