ബൈക്കപകടത്തിൽ സി.പി.എം നേതാവ് മരിച്ചു
കടയ്ക്കൽ: ബൈക്കപകടത്തിൽ സി.പി.എം മുൻ ബ്രാഞ്ച് സെക്രട്ടറി മരിച്ചു. പാങ്ങലുകാട് അഴകത്തുവിള പുത്തൻവീട്ടിൽ പി. ഷിബു (47) ആണ് മരിച്ചത്.കടയ്ക്കൽ -മടത്തറ റോഡിൽ ബുധനാഴ്ച രാവിലെ ഒമ്പതിന് ദർപ്പക്കാട് ജങ്ഷന് സമീപമായിരുന്നു അപകടം.പാങ്ങലുകാടുനിന്ന് ദർപ്പക്കാട് ഭാഗത്തേക്ക് ഇരുചക്രവാഹനത്തിൽ വരികയായിരുന്ന ഷിബു, റോഡ് മുറിച്ചുകടക്കാനായി തിരിയവെ പിന്നിൽനിന്ന് അമിതവേഗത്തിൽ വന്ന മറ്റൊരു ബൈക്ക് ഇടിച്ചുതെറിപ്പിക്കുകയായിരുന്നു. തലക്ക് സാരമായി പരിക്കേറ്റതിനെതുടർന്ന് തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും വ്യാഴാഴ്ച രാവിലെ മരിച്ചു.സി.പി.എം സ്വാമിമുക്ക് ബ്രാഞ്ച് മുൻ സെക്രട്ടറിയാണ്. കെട്ടിടം, പന്തൽ എന്നിവയുടെ നിർമാണരംഗത്ത് ജോലി ചെയ്തുവരികയായിരുന്നു. ഭാര്യ: സതി. മക്കൾ: ഷിജു, ഷിജി.
