പത്തനാപുരം: പാതയോരത്ത് മുറിച്ചിട്ടിരുന്ന തടിയിൽ ബൈക്കിടിച്ച് യാത്രക്കാരൻ മരിച്ചു. പിറവന്തൂർ വാഴത്തോപ്പ് കൊടിക്കാലായിൽ വീട്ടിൽ ജോസഫ് ജോൺസൺ (62) ആണ് മരിച്ചത്. പുനലൂർ-പത്തനാപുരം പാതയില്‍ പിറവന്തൂർ ഗവ. മോഡൽ യു.പി സ്കൂളിനും വാഴത്തോപ്പ് ജങ്ഷനും മധ്യേയായിരുന്നു അപകടം.പുനലൂരിലെ സ്വകാര്യ സ്ഥാപനത്തിൽ സെക്യൂരിറ്റി ജീവനക്കാരനാണ്‌. ജോലി കഴിഞ്ഞ് വീട്ടിലേക്ക് വരവേ എതിരെ വന്ന ലോറിക്ക് സൈഡ് കൊടുക്കുന്നതിനിടെ മുറിച്ചിട്ടിരുന്ന തടിയിൽ ബൈക്ക് ഇടിക്കുകയായിരുന്നു. വാഹനത്തില്‍ നിന്ന് തെറിച്ചുവീണ ജോസഫിെൻറ തലക്കും നെഞ്ചിലും പരിക്കേൽക്കുകയും വാരിയെല്ലുകൾഒടിയുകയും ചെയ്തു. ഗുരുതരമായി പരിക്കേറ്റയാളെ പുനലൂർ താലൂക്ക് ആശുപത്രിയിലെത്തിച്ചെങ്കിലും രക്ഷിക്കാനായില്ല. പുനലൂർ െപാലീസ് കേസെടുത്ത ശേഷം താലൂക്ക് ആശുപത്രിയിൽ പോസ്റ്റ്മോർട്ടം നടത്തിയ മൃതദേഹം ബന്ധുക്കൾക്ക് വിട്ടുനൽകി.
