കൊല്ലം: അഞ്ചുദിവസം മുമ്പ് മത്സ്യബന്ധനത്തിനിടെ കടലിൽ വീണ് കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. തങ്കശ്ശേരി ഇസ്താക്കി പറമ്പിൽ റീറ്റയുടെ മകൻ ഹാൾട്ടൻ റോയ് റോബർട്ടിെൻറ (36-റോയ് മോൻ) മൃതദേഹം ചെറുഅഴീക്കൽ ഭാഗത്തുനിന്നാണ് കണ്ടെത്തിയത്. കഴിഞ്ഞ ചൊവ്വാഴ്ച രാത്രിയോടെയായിരുന്നു അപകടം. ഫൈബർ വള്ളത്തിൽ റോയ്മോൻ ഉൾപ്പെടെ മൂന്നുപേരാണ് മത്സ്യബന്ധനത്തിനു പോയത്. കൂടെയുണ്ടായിരുന്ന ജെയിംസും രാജനും വല വലിച്ചുകൊണ്ടിരുന്ന സമയത്ത് മാൽ എടുക്കാനായി എൻജിൻ ഭാഗത്തേക്ക് പോകവെയാണ് ഹാൾട്ടൻ റോയ് കടലിൽ വീണത്. കരയിൽ നിന്ന് മറ്റു വള്ളങ്ങൾ എത്തി തിരച്ചിൽ നടത്തിയെങ്കിലും കണ്ടെത്താനായില്ല. നാലു ദിവസങ്ങളിലും തിരച്ചിൽ നടത്തിയിരുന്നു. ഞായറാഴ്ച രാവിലെ ഏഴോടെയാണ് ചെറിയഴീക്കലിൽ നിന്ന് തെക്കുപടിഞ്ഞാറ് മാറി വള്ളക്കാർ മൃതദേഹം കണ്ടത്. നീണ്ടകര, തങ്കശ്ശേരി എന്നിവിടങ്ങളിൽനിന്ന് വള്ളങ്ങളെത്തി രാവിലെ 11 ഓടെ മൃതദേഹം തങ്കശ്ശേരി ഹാർബറിൽ എത്തിച്ചു.
ഭാര്യ: സൗമ്യ, മക്കൾ: അസാലിയ എസ്. റോയ്, അഹാന എസ്. റോയ്.
