ഇരിങ്ങാലക്കുട: വയോജന കേന്ദ്രമായ ദൈവപരിപാലന ഭവനത്തിലെ അന്തേവാസി എടതിരിഞ്ഞി വിരുത്തിപ്പറമ്പിൽ പീറ്റർ (83) കോവിഡ് ബാധിച്ച് മരിച്ചു. മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. ഇതോടെ പട്ടണത്തിലെ കോവിഡ് മരണങ്ങൾ പതിനൊന്നായി. ഒക്ടോബർ 23ന് മരിച്ച ഇവിടെത്തെ അന്തേവാസി പാലക്കാട് കിഴക്കുംഞ്ചേരി സ്വദേശിക്ക് മരണാനന്തര പരിശോധനയിൽ കോവിഡ് സ്ഥിരീകരിച്ചതിനെ തുടർന്ന് പിറ്റേന്ന് നടത്തിയ പരിശോധനയിൽ പീറ്റർ ഉൾപ്പെടെയുള്ള അന്തേവാസികൾക്ക് രോഗം സ്ഥിരീകരിച്ചിരുന്നു. ചികിത്സയിലായിരുന്ന പീറ്റർ ബുധനാഴ്ച പുലർച്ചെ രണ്ടിനാണ് മരിച്ചത്. അവിവാഹിതനാണ്. കാഴ്ചക്കുറവുള്ള പീറ്റർ 23 വർഷമായി ദൈവപരിപാലന ഭവനത്തിലാണ് കഴിയുന്നത്. നന്തിക്കര സ്വദേശിയായ അന്തേവാസി കഴിഞ്ഞ ദിവസം കോവിഡ് ബാധിച്ച് മരിച്ചിരുന്നു.