കറുകച്ചാൽ: ഭാര്യയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി ദിവസങ്ങൾക്കകം ഭർത്താവും തൂങ്ങിമരിച്ചു. കുറ്റിക്കൽ തെക്കേവിളയിൽ ബെന്നിയെയാണ് (42) വ്യാഴാഴ്ച രാവിലെ വീട്ടിൽ തൂങ്ങിമരിച്ച നിലയിൽ കണ്ടെത്തിയത്. ബന്ധുക്കൾ ചേർന്ന് ഇയാളെ കറുകച്ചാലിലെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഞായറാഴ്ച രാവിലെ 10.30ഓടെയാണ് ബെന്നിയുടെ ഭാര്യ ഷൈനിെയ (36) കിടപ്പുമുറിയിലെ ജനാലയിൽ തൂങ്ങിമരിച്ച നിലയിൽ കണ്ടെത്തിയത്. ബെന്നിയും ബന്ധുക്കളും ചേർന്ന് ആശുപത്രിയിൽ പ്രവേശിപ്പിച്ചെങ്കിലും മരിക്കുകയായിരുന്നു. ഷൈനിയുടെ മരണത്തിൽ ദുരൂഹതയുണ്ടെന്നാരോപിച്ച് പിതാവ് പൊങ്ങന്താനം തുണ്ടിയിൽ ജോസഫ് സ്കറിയ കറുകച്ചാൽ പൊലീസിലും ജില്ല പൊലീസ് മേധാവിക്കും പരാതി നൽകിയിരുന്നു. ബെന്നിയെ ചോദ്യംചെയ്തുവരുകയായിരുന്നു. ഷൈനിയുടെ പോസ്റ്റ്മോർട്ടം റിപ്പോർട്ടിൽ അസ്വാഭാവികതയില്ലെന്നാണ് പൊലീസ് പറയുന്നത്. കോട്ടയം മെഡിക്കൽ കോളജിൽ സൂക്ഷിച്ചിട്ടുള്ള ബെന്നിയുടെ മൃതദേഹം പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകും. മക്കൾ: എൽവിൻ, എവിൻ. സംസ്കാരം പിന്നീട്.