അഗളി: ഷോളയൂർ പഞ്ചായത്തിലെ മൂച്ചിക്കടവ് താമസിക്കുന്ന പഴനിസ്വാമി കൗണ്ടറുടെ ഭാര്യ നല്ലമ്മാൾ (പൂവാത്ത -70) കാട്ടാനയുടെ ആക്രമണത്തിൽ കൊല്ലപ്പെട്ടു. ശനിയാഴ്ച പുലർച്ച ആറോടെയാണ് സംഭവം. അടുത്ത കാലത്തായി മൂച്ചിക്കടവ്, കോട്ടമല വനമേഖലയോട് ചേർന്ന് ചുറ്റിത്തിരിഞ്ഞിരുന്ന ഒറ്റയാനാണ് ആക്രമണം നടത്തിയത്. ശനിയാഴ്ച കാലത്ത് കൃഷിയിടത്തിലെ കമുകുകൾ കുത്തി നശിപ്പിക്കുന്നതുകണ്ട് വീടാക്രമിക്കുമെന്ന ഭയത്താൽ അയൽപക്കത്തെ വീട്ടിലേക്ക് ഓടിയ നല്ലമ്മാളെ കാട്ടാന പിന്തുടർന്ന് ആക്രമിക്കുകയായിരുന്നു. മാരകമായി പരിക്കേറ്റ നല്ലമ്മാൾ സംഭവസ്ഥലത്തു തന്നെ മരിച്ചു. അഗളി കമ്യൂണിറ്റി ഹെൽത്ത് സെൻററിൽ പോസ്റ്റ്മോർട്ടം നടപടികൾ പൂർത്തിയാക്കി വീട്ടുവളപ്പിൽ സംസ്കരിച്ചു. മക്കൾ: ലോകനായകി, പരേതരായ തങ്കവേലു, ജഗനാഥൻ. മരുമകൾ: ലോക.