വടക്കഞ്ചേരി: ദേശീയപാതയിൽ ലോറിക്ക് പിറകിൽ കാറിടിച്ച് രണ്ടുപേർ മരിച്ചു. കോട്ടയം കാണക്കാരി കളത്തൂർ കാരോട്ടുമണ്ണനാൽ നാരായണൻകുട്ടിയുടെ മകൻ അരുൺ (26), എറണാകുളം പുത്തൻകുരിശ് മണീട് എഴക്കരനാട് മുക്കടത്തിൽ മാത്യുവിെൻറ മകൻ ബിനു എം. മാത്യു (33) എന്നിവരാണ് മരിച്ചത്. ഇവരോടൊപ്പമുണ്ടായിരുന്ന തൃശൂർ ഇരിങ്ങാലക്കുട സ്വദേശിനി സരിതക്ക് (40) പരിക്കേറ്റു. ഇവരെ തൃശൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. സിനിമ-സീരിയൽ സെറ്റുകളിൽ ഭക്ഷണം എത്തിക്കുന്ന എറണാകുളത്തെ മീനാക്ഷി കാറ്ററിങ് നടത്തിപ്പുകാരാണ് അപകടത്തിൽപെട്ടത്. വെള്ളിയാഴ്ച രാത്രി പന്ത്രേണ്ടാടെ വടക്കഞ്ചേരിയിൽ നിർമാണം നടന്നുകൊണ്ടിരിക്കുന്ന മേൽപാലം ആരംഭിക്കുന്ന സ്ഥലത്തായിരുന്നു അപകടം. ദേശീയപാതയിൽ ആറുവരി പാത അവസാനിക്കുന്ന ഭാഗത്തുനിന്ന് വടക്കഞ്ചേരി സർവിസ് റോഡിലേക്ക് കയറുന്നതിന് പകരം നിർമാണത്തിലിരിക്കുന്ന മേൽപാലത്തിലേക്ക് കാർ കയറ്റുകയായിരുന്നു. ഈ സമയം ഇവിടെ മരം കയറ്റി നിൽക്കുകയായിരുന്ന ലോറിയുടെ പുറകിൽ കാർ ഇടിച്ച് കയറി. മൂന്നുപേരെയും നാട്ടുകാരും അഗ്നിരക്ഷാസേനയും പൊലീസും ചേർന്ന് വടക്കഞ്ചേരിയിലെയും പിന്നീട് തൃശൂരിലെയും സ്വകാര്യ ആശുപത്രിയിൽ എത്തിച്ചെങ്കിലും രണ്ട് പേർ മരിച്ചു. മൃതദേഹങ്ങൾ പോസ്റ്റ്മോർട്ടത്തിനുശേഷം സ്വദേശത്തേക്ക് കൊണ്ടുപോയി. സൂചന ബോർഡുകളില്ലാത്ത ഈ ഭാഗത്ത് പത്തോളം അപകടങ്ങൾ സംഭവിച്ചിട്ടുണ്ട്.