പെരുവ: അമിത വേഗത്തിലെത്തിയ ടോറസ് ലോറി തട്ടി സ്കൂട്ടർ യാത്രികനായ ടാപ്പിങ് തൊഴിലാളിക്ക് ദാരുണാന്ത്യം. സ്കൂട്ടറിന് പിന്നിൽ യാത്ര ചെയ്ത സുഹൃത്ത് പരിക്കുകളോടെ ആശുപത്രിയിൽ. കിഴൂർ ജാതിക്കാമല പാലിയപ്പാടം മാത്യൂസാണ് (45) മരിച്ചത്. ലോഡിങ് തൊഴിലാളി കീഴൂർ പരമാട്ടേൽ റെജിക്കാണ് (50) പരിക്കേറ്റത്. ഇന്നലെ വൈകീട്ട് ആറോടെ കീഴൂർ രാജൻ കവലക്ക് സമീപമാണ് അപകടം. പെരുവ ഭാഗത്തേക്ക് വരുകയായിരുന്ന മാത്യൂസ് സഞ്ചരിച്ച സ്കൂട്ടറിൽ അതേദിശയിൽ വരുകയായിരുന്ന ലോറി തട്ടുകയായിരുന്നു. ലോറിക്കടിയിലേക്ക് വീണ മാത്യൂസ് തൽക്ഷണം മരിച്ചു. റെജി റോഡിന് എതിർദിശയിലേക്ക് വീഴുകയായിരുന്നു. വെള്ളൂർ പൊലീസ് മൃതദേഹം കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി. കടുത്തുരുത്തിയിൽ നിന്നെത്തിയ ഫയർഫോഴ്സ് റോഡിലെ രക്തം കഴുകി വൃത്തിയാക്കി. മാത്യൂസിെൻറ ഭാര്യ: കീഴൂർ സർവിസ് സഹകരണ ബാങ്ക് ബോർഡ്അംഗം സിജി. മക്കൾ: ബിയമോൾ, മെൽബിൽ (വിദ്യാർഥികൾ).