കാഞ്ഞിരപ്പള്ളി: ദേശീയപാത 183ൽ കാഞ്ഞിരപ്പള്ളി നൈനാർ പള്ളി ജങ്ഷനിലുണ്ടായ ബൈക്കപകടത്തിൽ യുവാവ് മരിച്ചു. കാഞ്ഞിരപ്പള്ളി പാറക്കടവ് പത്തേക്കർ ലെയ്നിൽ ഒതളശ്ശേരിൽ ഷാജി - മോളി ദമ്പതികളുടെ മകൻ ഡേവീസാണ് (30) മരിച്ചത്. പെയിൻറിങ് തൊഴിലാളിയാണ്. തിങ്കളാഴ്ച വൈകീട്ട് 4.15നായിരുന്നു അപകടം. ബൈക്കിൽ ഡേവിസ് ലോറിയെ മറികടക്കുന്നതിനിടെ കോരുത്തോട്ടിൽനിന്ന് ചങ്ങനാശ്ശേരിക്കുപോയ സൈക്കോ സ്വകാര്യ ബസിടിക്കുകയായിരുന്നു. ഹൈവേ പൊലീസ് കാഞ്ഞിരപ്പള്ളി ജനറൽ ആശുപത്രിയിൽ പ്രാഥമിക ശുശ്രൂഷ നൽകിയശേഷം കോട്ടയം മെഡിക്കൽ കോളജ് ആശുപത്രിയിലേക്ക് കൊണ്ടുപോകുംവഴി മരണത്തിന് കീഴടങ്ങി. പോസ്റ്റ്മോർട്ടത്തിനുശേഷം ചൊവ്വാഴ്ച സംസ്കാരം നടക്കും. സോളി ഏക സഹോദരിയാണ്.