ആലുവ: ഗൂഗിൾ മാപ്പ് പിന്തുടർന്ന് വഴി തെറ്റിയെത്തിയ ചരക്കുലോറിയുടെ ഡ്രൈവർ കുഴഞ്ഞുവീണ് മരിച്ചു. കൊടികുത്തുമല എസ്.എസ് പോളിമേഴ്സിലേക്ക് ചരക്കുമായി വന്ന ഐഷർ ലോറി ഡ്രൈവർ കർണാടക മൈസൂർ തിലക് നഗറിൽ റോസൽ വെസ്ലിയാണ് (49) മരിച്ചത്. തിങ്കളാഴ്ച പുലർച്ച ആറരയോടെയാണ് ലോറി ആലുവയിലെത്തിയത്. എസ്.പി ഓഫിസിന് സമീപത്തുനിന്ന് തിരിഞ്ഞ് നേതാജി റോഡ് വഴി എടയപ്പുറം ഭാഗത്തേക്ക് എത്തി. ഇതിനിടെ, പലഭാഗത്തും കേബിൾ ലൈനുകൾ പൊട്ടി. ഇതിന് ലോറി ഉടമയുമായി ബന്ധപ്പെട്ട് നഷ്ടപരിഹാരം നൽകി ലോറിയിലേക്ക് കയറുമ്പോഴാണ് കുഴഞ്ഞുവീണത്.ഉടൻ നാട്ടുകാർ ചേർന്ന് അശോകപുരം കാർമൽ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഹൃദയാഘാതമാണ് മരണകാരണമെന്ന് ആശുപത്രി അധികൃതർ പറഞ്ഞു. മൃതദേഹം എറണാകുളം ഗവ. മെഡിക്കൽ കോളജ് ആശുപത്രി മോർച്ചറിയിൽ.